Bawion ko ang imong gugma

aoy iyang gihunahuna si Edelmar. Misantop sa iyang kahimungawong nga niarong orasa naglawig na ang barkong gisakyan niini paingon sa Ormoc. Mingaw. Gimingaw siya ni Edelmar. Ambot kun makalahutay ba kaha siya sa pagpakigbatok sa maong kamingaw nga miulipon kaniya.

Nianang pagkabuntag. Alas siyete nang nakamata si Annie. Nakugang siya sa balita nga gisibya sa radyo. May duha ka barko nga nagkabangga sa maong Mactan Channel duol sa Mandaue-Mactan bridge. Ang mga ngalan sa duha ka barko: M/V Subic Bay I ug M/V Wonderful Stars. Kalit miuylap ang kabalaka ni Annie. Nahinumdom siya nga ang barko nga gisakyan ni Edelmar paingon sa Ormoc mao ang M/V Wonderful Stars.

Sumala sa balita walay naangol nga mga pasahero sa duha ka barko nga nagkabangga. Apan nabalaka pa gihapon si Annie. Dili siya mahimutang hangtod nga masayran niya personal mente nga luwas ang kahimtang ni Edelmar.

Maayo gani kay nianang pagka udto nahitungha si Edelmar sa gipuy-an sa dalaga. Labihang lipaya ni Annie. Nahinangop siya pag-ayo pagkakita sa hinigugma.

“Salamat nga way daotang nahitabo nimo,” matud ni Annie.

“Nasayod ka na diay sa nahitabo sa akong pagbiyahe?” sukit ni Edelmar.

“Oo. Gibalita man sa radyo. Nabalaka man gani ko pag-ayo. Maayo kay mianhi gyud ka.”

“Gianhi tikaw aron dili ka na mabalaka. Pero mahinayon gyud ang akong paglarga sa Ormoc karong gabii sakay sa laing barko. -- Sumpayan pa