Ang tulisan nga nagbasol

Kinahanglan nga walay pinatyanay nga mahitabo atol sa tulis nga atong himoon unyang tungang gabii sa balay ni Mr. Po. Salapi ug mga alahas ra ang atong tuyo kaniya!" pahimangno ni Boboy ngadto sa iyang mga ginsakopan samtang nag-inom ug nagplano sila sa usa ka maitom nga laraw usa ka higayon niana.

"Lisod na ang panginabuhi karon. Mahal na ang tanan. Gikan sa gasolina, pagkaon ug hangtod sa eskuylahan. Busa, manglihok kita aron maka-jackpot sa daklit lang nga panahon. Dako-dako gyod ang matulis nato kang Mr. Po kay milyonaryong Insik god siya!" padayong namulong si Boboy samtang nagyarok sa baso sa bino.

"Bosing, kami lang si Poldo ang lookout samtang makasulod namo si Biano sa panimalay ni Mr. Po," sagbat pa ni Pepe samtang nagpabuhot sa iyang sigarilyo.

Si Mr. Po giila nga milyonaryo nga negosyanteng Insik sa ilang dapit. Dako’g tindahan ug yutaan siya. Edad-edaran na siyang naminyo kang Perly nga iyaha ra usab nga hitsuraan nga katabang ug masugo-sugo.

Gawas niini, nanag-iya usab si Mr. Po ug usa ka lending company sa ilang dapit. Daghan ang modangup sa pagpangutang gumikan sa ekonomikanhong krisis karong panahona.

"Balikon nako, walay pagpatay nga mahitabo atol sa tulis. Kuwarta ra ug alahas ang atong tuyo. Ug andama ang inyong mga armas unyang tungang gabii. kasabot," dayong barog ni Boboy aron sa pagpangandam ug sa pagpahulay sa makadiyot.

Pilay estorya, miabot na ang gitagal nilang takna sa pagpanulis. Sigon sa plano, si Pepe ug Poldo maoy silbing lookout sa gawas sa dakong balay ni Mr. Po. Midiretso sila si Boboy ug Biano sa master's bedroom. Gibuksan ni Boboy sa hinayhinay ang pultahan sa lawak ni Mr. Po.

Maoy nakita ni Biano nga maayong pagkahinanok si Mr. Po niadtong higayona. Gibuksan ni Boboy ang drawer sa lamesa ni Mr. Po ug gisenyasan niya si Biano sa pagpaduol kaniya aron isulod ang mga binandol nga papel de bangko sa duffer bag nga dala niini.

Walay langan nga dali ra kaayong nasulod ni Biano ang mga salapi sa duffel bag. Karon, gipangita na ni Boboy ang 'jewelry box' nga gisudlan sa mga mahalong alahas.

Diha ra diay ang jewelry box sa ulohan ni Mr. Po. Sa pag-abli pa ni Boboy sa jewelry box, nakahimo kini og kasaba kay milabtik man ang safety lock niini.

Gumikan sa kasikas nga nahimo, nahigmata si Mr. Po ug maoy misugat sa iyang mga mata ang daotang talan-awon.

Misinggit taman sa ginhawa si Mr. Po lakip na si Perly. Ang ilang nagakabang nga mga tingog maoy mibuak sa lubnganong kahilom nga mipatigbabaw niadtong higayona.

Gumikan sa kakalit sa dagan sa mga panghitabo, nakablit wala damha ni Boboy ang gatilyo sa iyang pistola ug naigo si Mr. Po sa iyang ulo lakip na usab si Perly nga maayong pagkaigo sa iyang dughan.

Patay diha-diha si Mr. Po ug si Perly. Nanggawas dayon sila si Boboy ug mga kaubanan sa balay ni Mr. Po ug misakay dayon sila sa usa ka multicab nga ilang giparking sa unahan.

Pag-abot nila sa hilit nga dapit, gibahin nila ang ilang mga tinulis lakip na sa mga alahas. Apan nakonsiyensiya si Boboy sa pagpatay nga nahimo atol sa tulis. Siya ra ba gyod ang nag-utas og pahimangno sa iyang mga kaubanan nga likayan ang pagpatay sa mga biktima atol sa krimen.

Miuna siya sa paglakaw ug mipauli siya sa ilang panimalay. Gihatag niya ang iyang asawa nga si Binyang ang salapi ug alahas nga tinulis ug mipahilayo dayon siya.

Midiretso siya sa presinto sa kapolisan.

"Sir, nakatulis ug nakapatay ako," tingog pa ni Boboy ngadto sa polis nga desk-on-duty.

Misurender si Boboy kay nagbasol siya sa iyang nahimo. (Kataposan)