Ang kinatumyan

Gula 4

Andam na si Clarissa kun unsay mahitabo sa panag-uban nila ni Bell nga manager sa gitrabahoan niyang kompaniya.

Nakadawat og laing text message si Clarissa gikan ni Bell. Adto siya pahuwaton sa grahe sa sakyanan sa manager. Gituman ni Clarissa ang giawhag ni Bell kaniya.

Nadani kaayo si Clarissa sa mahalong sakyanan ni Bell. Grabe ka dark ang mga samin nga dili gayud makita ang tawo sa sulod.

Gisuwayan niya’g sil-ip ang sulod sa sakyanan apan wala gayud siya’y nakita. Nakurat na lang si Clarissa kay mikalit lang og abli ang bildo sa samin nga iyang gisil-ip.

“Sakay na Clar,” nadungog ni Clarissa ang tingog ni Bell nga wala niya masayri nga diha na diay sa sulod sa sakyanan.

Nakurat kaayo si Clarissa kay wala man siya makakita ni Bell nga migawas sa iyang opisina dihang misulod kini kaganina.

Misakay si Clarissa. Gipadagan dayon ni Bell ang sakyanan. “Nasayud ko nga nahibulong ka kun nganong diha na ako sulod sa sakyanan,” gibuak ni Bell ang kahilom tali kanila.

“Bitaw, giunsa nimo Sir?” matud ni Clarissa nga daw gihakop pa sa tumang kahibulong.

“Ikaw ra ang akong sultihan niini gawas sa akong private secretary nga ang akong opisina dunay sekreto nga pultahan paingon dinhi sa akong grahe,” ni Bell pa.

Wala gihapon makontinto si Clarissa sa iyang nadungog kay pag-abot niya sa grahe kaganina, wala g’yud siya’y nakita nga pultahan.

“Sekreto ang pultahan sa grahe Clar mao nga wala g’yoy makabantay nga duna kini agianan paingon sa akong opisina sa taas,” dugang pagpasabot ni Bell.

Didto sila mipaingon sa taas nga building sa duol sa Fuente Osmeña. Misakay sila’g elevator paingon sa ika-19 nga andana.

Dihang nagpaabot pa sila sa ilang gi-order nga pagkaon, miadto sila sa terrace ug nasabtan ni Bell nga nalipay kaayo si Clarissa nga nakaadto sa maong dapit.

Bantang kaayo sa panan-aw ni Clarissa ang tibuok bahin sa dakbayan. Takulahaw lang, daw mipilit ang iyang panan-aw dihang nakita niya ang barangay hall sa Day-as. Sa luyo niini mao ang gipuy-an nila kaniadto ug sa iyang bana.

Naputol ang iyang paghanduraw sa iyang kaagi dihang mipikpik si Bell sa iyang abaga. “Tana, tua na ang akong gi-order nga pagkaon.”

Human sa ilang pagpangaon. “Andam ka ba nga mokuyog kanako karong gabhiona Clar?” ni Bell pa.

Wala na motingog si Clarissa. Nasabtan ni Bell nga wala mobalibad si Clarissa. Dihang nakasakay na sila sa tinted nga sakyanan ni Bell, gihagkan dayon si Clarissa sa iyang manager. (Sumpayan)