Gula 9
“Ayaw kabalaka nako. Ako nay maantigo sa akong kaugalingon.”
“Gimahal tikaw, An. Kun dili pa lang tungod sa atong kaugmaon, dili ko kini buhaton. Dili sab ko gustong magkalagyo ta. Pero gikinahanglan ug gipangayo sa higayon.”
Wala na motingog si Annie. Gikabungat na niya ang iyang pagsanong sa plano ni Edelmar ug dili na mahimong iya kining bakwion. Mao nga wala na siya’y laing mahimo gawas sa pagpaabot sa sunod mahitabo. Sa linugdangan sa desisyon ni Edelmar.
“Lauman ko ang imong pagbalik,” mao ray nabungat ni Annie.
“Salamat,” ni Edelmar.
Biyernes sa hapon. Nagkasabot sila si Edelmar ug Annie nga manuroy. Nakasabot si Annie nga mao na kini ang kataposang pagpanuroy nila ni Edelmar. Mao na kini ang kataposan nila nga panag-uban kay ugmang adlawa mogikan na man ang ulitawo paingon sa Leyte.
Nanan-aw sila’g sine. Pelikulang English ang ilang gitan-aw diin maoy nagdala sa papel sa protagonista si Julia Roberts. Love story ang salida. Apan walay nasabtan si Annie sa pelikula nga ilang gitan-aw. Maoy mipasulabi sa iyang hunahuna ang kabalaka sa umaabot nga panaglagyo nila ni Edelmar.
Daw buot pugngan ni Annie ang mga gutlo. Dili siya buot nga mairog ang orasan kay dili siya buot nga maputol ang mabulokong higayon nga gigahin alang sa panag-uban nila ni Edelmar. Gipaningkamotan niya nga ikasalindot sa makadiyot ang kahasol sa paghunahuna nga ugmang adlawa magkalagyo na sila si Edelmar. -- Sumpayan pa