Bawion ko ang imong gugma

Gula 6

Wala makatingog si Edelmar. Igo lang kining nahitutok kaniya.

“Nasayod ka gyud, Ed,” ni Annie pa, “nga wala pa kita magkalagyo sukad masukad. Mao nga mora’g di gyud nako maantos ang bation kong kamingaw nimo sa higayon nga magkalagyo kita.”

“Ikaw ra ba guy mingawon?” Nagkanayon si Edelmar. “Lakip usab ako. Gimahal ta gud ka. Pero ako sab nga natimbang-timbang nga kun magpadaog kita sa kamingaw, wala gyu’y mahitabo sa atong kinabuhi. Magpabilin kitang ingon niini hangtod sa hangtod. Mao nga kinahanglang praktikal na kita karong panahona.”

Si Annie na usab ang wala makatingog. Ingon sa natabonan siya sa mga katarongan nga gipadayag ni Edelmar sa iyang atubangan.

“Hangyoon ko ang imong pagsabot niining higayona, An,” matud ni Edelmar. “Sa gikaingon ko na, alang kini sa atong kaayohan. Sa mahayag nato nga kaugmaon.”

Nasuta ni Annie nga wala na siya’y mahimo pa. Magpadayon man siya pagsupak apan dili na niya mausab ang hukom ni Edelmar. Mosangpot lang unya sa panaglalis nga makaapekto sa ilang relasyon kun magpabilin siya sa iyang pagmagahi.

“Unya,” ni Annie pa nga milugak na sa iyang kabubut-on, “kanus-a ka man molarga?”

“Maghulat pa ko sa kuwartang ipadala ni Tiyo nako alang sa akong pamilite paingon didto,” ni Edelmar pa. “Kun padad-an na ko niya’g kuwarta, molarga dayon ko.” -- Sumpayan pa