Gula 46
“Salamat nga wa nimo ihikaw kanako ang kahigayonan nga akong gipangayo nga ika-table ka sa laing higayon,” nagkanayon si Mr. Waldon.
“Dili ko makabalibad ni Madam Minorka,” maoy tubag ni Xenia. “Giisip kong dakong utang kabubut-on niya ang iyang pagdawat nako isip singer ning club. Hapit na ko kawad-i’g paglaom nga makakita’g trabaho sa dihang gipaila ko sa akong higala ngadto ni Madam Minorka kinsa wala sab magduhaduha sa pagdawat gilayon nako.”
“Buotan gyud kana si Minorka. Masinaboton ug matinabangon.”
“Mao bitaw nga dili ko makabalibad kun may pabor nga pangayoon si Madam Minorka nako.”
Nahilom sila sa makadiyot. Miinom si Mr. Waldon og serbesa. Miinom sab si Xenia sa lady’s drink nga gi-order ni Mr. Waldon alang niya.
“Mahimo bang dapiton ko ikaw nga mangaon sa gawas?” Gikan ni Mr. Waldon. “Kadiyot lang gud.”
“Gidid-an mi sa management sa club sa pagkuyog ni bisan kinsang kustomer ngadto sa gawas,” mipasabot si Xenia agi’g balibad.
“Nasayod ko. Pero makigsulti ko ni Minorka. Ako nay maantigong mopasabot kaniya.” -- Sumpayan