Daklit nga kalipay

Nagtinabangay sila si Nang Teresa ug Temyong pag-atiman sa dalaga nga daw naglisud na sa pagginhawa. Gihangyo ni Temyong ang kapitan sa ilang barangay nga magamit ang multicab niini nga kasakyan kay dad-on nila sa ospital si Tess.

Apan dihang gialsa na ni Temyong si Tess, nabantayan sa magtiayon nga nalum-oy na ang dalaga. “Temyong, Temyong, mora’g patay na man kini si Tess!” misinggit nga naghilak si Nang Teresa. Gihimulsohan ni Temyong si Tess, wala na tuo’y pulso. Patay na g’yud si Tess.

Wala na silay laing nahimo gawas sa paghilak. Ang mga ginikanan ni Tess nasayud na nga ang dalaga adunay sakit ug gilimdan lang nila kini aron dili maguol. Kini maoy rason nga sila si Temyong ug Teresa wala lang masuko bisan og nasayod nga gitugyan sa ilang anak ang iyang pagka babaye ni Stanly tungod kay kalipay man sa ilang anak.

Kalit sila nga napugwat kay mitingog ang call alert sa cellphone sa dalaga nga diha sa iyang bulsa. Gikuha dayon kini ni Temyong ug nakita nga ang nanawag naka-register nga Love Stanly.

Gitunol ni Temyong ang cellphone kang Teresa aron tubagon. “Hello,” daw nagkurog pa ang tingog ni Teresa. “Nang, hain si Tess? Nabangga ang bus nga akong gisakyan apan maayo gani kay diri ko naglingkud sa luyo wala ko maunsa.”

“Dong, balik na lang diri sa Dalaguete. Ayaw na lang pagdayon sa siyudad, importante kaayo,” giingnan ni Teresa si Stanly. “Ha? Ngano man Nang? Ipalihug ko ni Tess,” dali nga tubag ni Stanly nga ang tingog tugob sa kahibulong.

Giputol ni Teresa ang ilang pagsultihanay ug ni Stanly. Milahus g’yud si Stanly sa dakbayan sa Sugbo kay gipatambalan niya ang mga pangus nga iyang naangkon sa kalawasan. Mibalik dayon siya paingon sa Dalaguete pagka hapon ug gabii na nga miabut sa lungsod. Nagpakyaw siya og habal-habal nga mohatud kaniya sa barangay Manluray.

Nahibulong si Stanly kay hayag kaayo ang tibuok balay nila ni Tess. Sa iyang huna-huna dili kini sagad mahitabo kay taud-taud na siya nga nagpuyo sa balay uban sa iyang hinigugma.

Pagkanaug niya sa habal-habal, mideritso siya pagsulod. Maoy misugat sa iyang panan-aw ang lungon nga diha sa hawanan sa balay. “Kinsay namatay?,” nakapangutana si Stanly. Gitutokan lang siya ni Nang Teresa ug Temyong ingon man sa ubang tawo. Miduol si Stanly sa lungon ug misiga ang iyang mga mata sa pagkakita nga minatay.

“May sakit sa kasing-kasing si Tess, Dong Stanly. Giatake siya pagkadungog nga may bus nga nabangga ug nga wala ka na niya makontak,” saysay ni Nang Teresa sa ulitawo.

Walay nahimo si Stanly gawas sa pagbakho. Giitos niya ang iyang mga luha ug didto sa kwarto sa dalaga gihandum ang daklit nila nga kalipay. (Kataposan)