Bangka de motor ni Eleodoro mangtas

Mao kini ang gisaligan ni Doro o Eleodoro sa iyang inadlaw’ng panginabuhi ang pagmaneho-panimon sa bangka de motor nga iyang napalit kang Mr. Anastacio dugay na karon. Tingali, mokabat na sa lima ka tuig kining maong bangka de motor ni Doro.

Maayo man gud og pangamot si Doro kay may kasinatian siya sa makina. Ug niining paghupot niya ning maong negosyo nakapa-eskuyla siya sa duha niya ka anak sa kolihiyo.

Si Milet talitapos na sa kursong B.S. Psychology samtang si Mara anaa pa sa ikatulong ang-ang sa kolihiyo sa kursong BSBA.

Ang biyahi ni Doro sa iyang bangka paingon gyud sa isla Dangandangan, ang isla nga daghan kaayong buwad, gani, anha man mangompra ang taga siyudad og klaseklaseng buwad sama sa buwad kogita, buwad nokos, buwad bodboron, buwad kiyampi, buwad salmonites, buwad tabagak ug buwad labtingaw, kay medyo bubarato ra ang presyo sa buwad dinhi.

Bisa’g gabii na mobiyahe gyud si Doro sa isla kay nanguyawat lagi pud nga makakuwarta kay dunay nangiskuylang mga anak. Unya, wala damha nga mikaylap ang tabitabi nga si Doro kuno gipatakdan pagka-ungo nga taga isla Bonbon ang mipatakod kaniya, silingang isla sa isla Dangandangan.

“Unsa, si Doro, natakdan pagka-ungo?” miiknat ang kilay ni Soling manikyurista nga taga isla Dangandangan. May puwesto siya sa lungsod diin magpuyo si Doro ug kusog kaayo ang kita sa iyang parlor.

“O, lagi, mao nay tabitabi, Ling,” tubag ni Katrina, ang mangungorte og buhok sa iyang parlor.

“Sus, kakuyaw gud. Kada gabii ra ba ko uli sa amo didto sa isla, aw, amigo man hinuon mi si Doro. Tinuod ba gud na, Katrina, nga natakdan si Doro?”

“Tinuod lagi. Si Damian ang nasayod kay taga isla Bonbon man ang iyang asawa.”

Wala na lang motingog si Soling nga gibatig kahadlok sa iyang nasayran.

Sa maong tabitabi bahin kang Doro ingon sa wala nay manakay sa iyang bangka de motor. Ang uban adto na lang sa siyudad mosakay og lansa nga magbiyahian sa isla Dangandangan.

Unya, demalas gyud si Soling, kay nakasakay siya karon sa bangka demotor ni Doro. Lawom nang gabii ug mitadlas ang bangka sa lapad nga lawod paingon sa isla. Samtang naglawig ang bangka de motor may mibanhig kanila ni Soling nga mga tulisang dagat ug gipahunong si Doro. Mga armadong tawo ang miduol kanila nga may dalang mga high power nga armas de fuego.

“Bangka de motor lang among tuyo, pare,” matud sa usa ka tulisang dagat. “Busa, ambak na lang mo, kamong duha niining babaye, he, he, he, kay kun dili mo mangambak sa dagat mga bala ang mohukom ninyong duha, sige na, ambak na mo, o, niay kontinir nga maoy inyong silbing gabayan...”

“Dili mahimo, pare, dugay na nako kining akong bangka,” unya kalit lang nausab ang nawong ni Doro. May mga balhibong tag-as nga nanurok pagkalit ug nanag-as ang iyang mga kuko ug mga ngipon ug may bangkil na siya ug sama sa kilat nga milukso kini paingon sa laing bangka de motor nga gisakyan sa mga pirata nga lima ka buok.

Gipaak-paak, gibugno ug gikuniskunis ni Doro ang mga pirata ug unya gisuyop ang ilang dugo ug human gitambog sa dagat ang ilang mga patay’ng lawas nga luspad na.

Si Soling nga nakasaksi sa gibuhat ni Doro nga usa na ka mangtas nakuyapan dihadiha. Gihatod ni Doro si Soling sa ilang balay. Pagkabuntag didto sa iyang parlor, gisugid niya kang Katrina ang nahitabo sa miaging gabii.

Gibati og kahadlok si Katrina ug si Soling wala gyud mosakay pag-usab kang Doro, apan nalipay lang siya sa kadugay niyang sakaysakay sa bangka de motor ni Doro wala gyud siya hilabti niini.

Busa, matag gabii, mosakay na lang siya ni Doro sa bangka de motor niini, kay silingan man diay niya si Doro didto sa isla Bonbon. (Kataposan)