Gihatud ni Tess ang hinigugma niya nga si Stanly didto sa lungsod sa Dalaguete. Diha na siya mipauli nga nakasakay na si Stanly sa usa ka bus paingon sa dakbayan.
“Take care Stanly,” matud ni Tess samtang mipig-it sa kamot sa ulitawo. Subo si Tess samtang nagsud-ong sa nagkalayo nga bus nga gisakyan sa iyang hinigugma. Misakay na lang usab si Tess og habal-habal nga mohatud kaniya sa ilang barangay sa bukid.
Taud-taud, mitingog ang message alert sa iyang cellphone, nalipay siya kay si Stanly ang mi-text nga nagpahibalo nga Carcar na sila dapit. “Paabota ko Tess kay dili ko magdugay,” matud ni Stanly sa tumoy sa iyang text message.
Pag-abot ni Tess sa ilang balay, gilaay kaayo siya. Nabag-ohan siya nga wala na ang iyang hinigugma nga nakauban na niya sa milabay’ng mga adlaw sa ilang balay. Nakahukom siya nga maminaw na lang og music. Misamot ang iyang kasubo kay ang mga gipatugtog nga love songs makahuloganon kaayo og mga lyrics.
Taud-taud, ang announcer mikalit lang pagtingog. “Putlon usa nato ang pagpabati kaninyo sa mga awit kahigalaan kay among ipahibalo nga dili pa lang dugay may bus nga nabangga didto sa dakbayan sa Naga, ang report dunay mga namatay ingon man mga nasamdan, paabota ninyo ang detalyi karong taud-taud.”
Gikulbaan kaayo si Tess. Dali niya nga gikuha ang iyang cellphone og giteksan niya si Stanly. Nagbuto-buto na ang iyang dughan sa kakulba kay diha sa iyang huna-huna nga basin og ang gisakyan ni Stanly ang nabangga. Wala pa gayud siya makadawat og reply.
Gisuwayan niya’g tawag ang numero ni Stanly apan dili usab makontak. “Ma! Ma!” gitawag ni Tess ang iyang inahan nga didto sa silong. Naghilak na si Tess. “Naunsa ka anak? Unsay imong gihilakan?” nangutana si Manang Teresa sa iyang anak.
“Ma, may bus nga naaksidente sa Naga… gikulbaan ko nga basin og ang gisakyan ni Stanly ang nabangga kay daghan ra ba kuno ang patay. Dili na nako makontak ang iyang numero,” naghilak na gayud si Tess.
Giam-aman si Tess sa iyang inahan nga dili magpalabi. “Kalma lang anak, ayaw pagpalabi sa imong gibati,” ni Nang Teresa pa. Misulod si Tess sa iyang kwarto ug didto nagpadayon sa paghilak. Taud-taud, giadto ni Nang Teresa si Tess apan maoy iyang naabtan nga naglisud na kini sa pagginhawa.
“Temyong! Temyong! Pagdali! Tabangon nato si Tess!” nagkapagaw si Teresa pagtawag sa iyang bana. (Sumpayan)