Pilay plete, Dong, ngadto sa Lorega?" sukot sa tawo ngadto ni Ritche nga nagkapyot tungod sa pultahan sa dyip de pasaheroan. Nagdagan na ang sakyanan nga biyahe’g Mandaue-Manalili.
Bag-o lang nisakay sa dyip ang tawo dihang ni-parking sila kadiyot duol sa Jollibee sa Highway Mandaue eskina dalan A.S. Fortuna. Di pa kaayo daghan ang pasahero ning sayong kahaponon sa adlaw'ng Sabado. Wa pa napuno ang mga lingkuranan. Tagwalowalo ang makalingkod sa matag lingkuranan sa walag tuong habig sa dyip. Lima pa ang nakalingkod dapit sa too. Sa wala, tulo pa. Usa sa tulo ang tawo nga nangutana.
"Manalili! Manalili!" nanangpit siya’g mga pasahero. Wa una niya tubaga ang tawo. Ang tinood, si Ritche nga konduktor ining dyip balig tulo ka tuig na, dili motug-an sa tinod. Otso pesos ray tinood nga pletehan. Apan ang iyang itug-an kasagaran dose, onse ug usahay diyes pesos. Kana kay nangutana, wa nasayod. Busa, di kasupak kun tug-anan niya’g mas dako sa tinood. Wa pa gayud hinooy nireklamo niya sukad masukad.
Apan karon, nagpanagana siya’g pamakak.
"Ah" niya pa. Dugay siyang nakasumpay.
Nagtan-aw siyas tawo nga hamtong na. Desente og barog. Nagkarsones og maong. Nagsul-ob og sapatos guma nga imported. Nag-t-shirt og asul nga haum kaayo sa iyang lawas. Daw military o polis ang bayhon sa tawo kay ang tupe semi-opaw. O opisyal ba kaha sa LTO. Daw singkwentahon na ang edad sa tawo. Apan ang porma sa lawas, morag si Derek Ramsay.
Nakahukom si Ritche sa pagsultis tinood.
"Otso pesos, sir" tubag niya.
"Maayo kay nisulti kas tinood. Buotan ka. Madato ka kay honest ka man" sa tawo nga nipahiyom.
"Di man maayo sir nga mopakaon tas atong pamilya og tinikasan" ni Ritche.
Nisakay sa istorya. Nagpabilib sa tawo. Bisag kadaghan na gyud niya buhata ang pag-over price sa pletehan. Karon nisulti lang siyas tinood. Kay nahadlok man siya sa pasahero.
"Kadaghan naman ko kasakay og dyip de pasaheroan pareha’g rota ini.May konduktor moingon dose. May moingon onse. Kadaghanan moingon diyes. Mobayad lang kong way reklamo. Karon pa ko kadungog diha nimo nga niingon otso. Busa, mao gyud nay tinood. Kay mao may kinagamyan," dugang sa tawo.
"Mao gyud nay sakit sa ubang konduktor, sir. Kun ang pasahero mangutana, sa ato pa, way kalibutan. Di tigsakay og depasaheroan. Pahimudsan dayon ang kaignorante sa pasahero. Paakon dayon. Di man sakitan.Kay wa may kalibutan," ni Ritche.
"Ha ha ha" nakatawag hinay ang tawo."Korek ka diyan.Apan konsensiya nalang nila ang maghasol unya nila. Mao nga ikaw, bilib ko nimo. Kay may konsensiya diay ka," sa tawo.
"Salamat sir. Sa gikaingon ko na, di ko gustong mamintaha," ni Ritche. Nipasiklap siya sa rear view mirror. Nagtan-aw diay niya si Roy ang drayber nga iyang ig-agaw. Nangyamiid nga nagpahiyom si Roy. Nagpakaaron ingnon na lang siyang wa kakita sa rear view mirror.
"Mag-unsa man diay ka sa Lorega, sir?' ni Riche. "Duna koy kuhaong sakyanan," sa tawo.
"Unsang sakyanana?' ni Ritche. "Akong Isuzu Crosswind nga gipaayo ang aircon sa ilang James Atop, duol sa Junior's Vulcanizing" sa tawo.
"Pulis gyud diay ning tawhana" sa hunahuna ni Ritche. Nisaylo na ang dyip sa Carreta. Pag-abot sa eskina likoan padulong sa M.J. Cuenco, nipara ang tawo.
"Dinhi lang ko, Dong" sa tawo. Pak! Pak! Gihapak ni Ritche ang atop sa dyip. Signal sa drayber nga pahunongon ang dyip.
"Plete nako, Dong o" sa tawo pagdayong naog. "Keep the change. Gipremyohan tika. Kay buotan man ka," dugang niya.
"Salamat kaayo, sir"ni Ritche. Dako niyang kahinangop. Gitunolan siyag tibook bayente pesos.
May ganti gyud diay ang honesty. Apan di tingale to siya polis oy! Basig pari. O doctor ba kaha?" tuaw niya sa hilom. Nisenyas iyang ig-agaw og thumbs up ngadto ni Ritche. (Kataposan)