Anino ni Jacky Chan

Mao pa gani pag-abot ni Dodong Bobby gikan sa eskuylahan nidiritso gilayon kini sa luyong bahin sa ilang balay. Iya dayon gipraktisan og suntok maingon man flying kick ang punching bag nga gibitay sa may punoan sa nangka.

"Uy!! Dong Bobby, panglawog una sa atong mga baboy una ka mag-practice diha!!" singgit sa iyang maguwang nga si Jenny. Kinse anyos na si Dodong Bobby, third year high school, gi-idolized niini pag-ayo ang Chinese action star nga si Jacky Chan.

Ang allowance niini para sa iyang pag-eskuyla hapit adto na tanan mapunta sa mga dvd tapes sa salida sa idol niini. Ang kuwarto sa batan-on napuno sa mga poster maingon man mga newspaper clippings mahitungod ni Jacky Chan gikan adtong iyang mga naunang salida sama sa Drunken Master, Eagles Shadow hangtud sa mga latest movies niini.

Daw anino ni Jacky Chan ang batan-ong si Dodong Bobby. Gisundog niini ang style sa buhok, ang binistihan, ang linihokan maingon man ang pagkakomedyante sa idol niini. Kun walay klase adto magyampungad ang batan-on uban sa iyang mga higala sa Black Dragon Karate Club nga gipanag-iya sa blackbelter nga si Joel Paran nga naa ra usab mahimutang duol sa eskuylahan.

Samtang si Jenny, ang seksi nga maguwang ni Dodong Bobby graduwado sa kursong Commerce mga pipila na ka buwan sukad sa iyang graduation pero wala pa gihapon kini makakita og trabaho. Bisan sa gihuptang kaanyag niini, zero pa ang lovelife sa dalaga.

Ilong tuwapos na ang managsoong Bobby ug Jenny, na-missing ang gisakyang eroplano sa ilang mga ginikanan, mga pulos government employee, dihang naglakbay aral kini didto sa Africa. Mao na lang ang gisaligan sa managsoon ang monthly GSIS pension sa ilang mga ginikanan.

Dako kaayong supak sa kabubut-on ni Jenny kining pagkahilig sa iyang manghud sa karate. Basin mapiang o pirmi na ba hinuon kini nga makakita og away. Pero wala man sab hinuon pasagdi niini ang iyang pag-eskuyla consistent man kini nga top ten sa ilang klase matud sa principal niini nga si Mr. Sid Biscocho.

Usa ka adlaw niana nag-atang og jeepney aron masakyan ang managsoong Bobby ug Jenny, gikan sila nga nagkobra sa GSIS pension sa ilang mga ginikanan didto sa Orion Bank sa may Magtalisay city. Dihang kalit lang may mihunong nga motorsiklo nga adunay duha ka sakay nga armado nga mga lalaki, kalit nga mition sa iyang armas ang usa ngadto sa managsoon.

"Ambi kanang inyong dalang bag kun dili mo gusto nga mamatay," matud sa nag-backride nga karat kaayo og tingog.

Nangurog ug namugnaw og maayo si Jenny apan sama ka kusog sa kilat kalit nga nilupad ang flying kick ni Dodong Bobby nga mitama sa apapangig sa nag-backride. Wala usab makaporma ang nagdala sa motor tungod sa kusog nga karate chop nga mitugpa sa tangkugo niini walay panimuot nga nangligdas ang duha ka snatcher daplin sa karsada. Taudtaod adunay mga polis nga nangabot ug giposasan ang duha ka snatcher.

Pagkaugma niana, sa balay sa managsuong Jenny ug Dodong Bobby dunay wala damhang bisita nga miabot, si Capt. Mark Espiritu, ang station commander sa Magtalisay city.

"Nalipay kaayo ang mayor, kay kadtong mga snatcher nga inyong naengkuwentro Dodong Bobby maoy utok sa mga snatching ug tulis dinhi sa atong dapit, mao kadto sila si Kiko ug Sidrong Kidlat. Tungod niini apil unya kamong managsoon nga pasidunggan karong umaabot pista. Gawas usab niana aduna usab giandam nga trabaho ang mayor para kanimo Jen didto sa City Hall," matud sa macho ug ulitawo nga station commander nga adunay makahuluganon nga tinan-awan ngadto sa dalaga.

Dako kaayo ang gibati nga kalipay ni Jenny, wala siya magdahum sa mga dakung kahigayonan nga niabot sa kinabuhi nilang managsoon. Wala niya damha ang mga pabor nga nitunga tungod sa abilidad sa iyang manghud, daw anino ni Jacky Chan. (Katapusan)