Daklit nga Kalipay

Gula 3

Wala g’yud damha ni Stanly nga makigkita kaniya ang babaye nga naluwas niya gikan sa tawo nga buot unta molugos kaniya mga tulo ka gabii na ang milabay.

Sa unang higayon nagkatinutokay sila si Stanly ug Tess. Diha pa gayud masuta sa ulitawo nga matahum gayud ang babaye nga iyang naluwas. Gipasalamatan si Stanly sa mga ginikanan ni Tess sa daku niyang nahimo pagluwas sa ilang anak gikan sa manlulugos.

Taud-taud, may miabut nga nagdala’g pagkaon, apil na ang usa ka litson nga gihatud og usa ka multicab. “Ayaw ninyo isipa nga dunay kahulogan kining among gihimo Stanly. Tungod lang kini sa daku namong kalipay nga miabut ka dinhi sa among lugar ug nakahimo dayon og kaayohan,” matud sa amahan ni Tess nga konsehal sa silingang barangay.

“Walay problema Konsehal kay matag usa kanato angay’ng motabang kun dunay magkinahanglan,” dali nga tubag sa police agent. Nahimong suod ni Stanly si Tess gikan niadtong gabhiona.

Nagsuginlanay sila sa ilang kaagi. “Police agent ka diay Stanly?,” gipangutana siya ni Tess. “Yes, apan palihug ayaw kaayo ipanabi kay aron dili daghan ang mahibawo ug para maepektibo ako sa akong katungdanan.”

Nanglabay ang mga adlaw sa ilang panagsuod. Usahay mobisita na si Stanly sa ilang balay ni Tess. Hangtud nga ang ilang panagsuod misangpot sa paghinigugmaay. “Wala g’yud ko magdahum nga ang tawo nga miluwas kanako sa mga kamot sa manlulugos mahimo ko nga hinigugma,” matud ni Tess nga nagpahiyom.

Usa ka adlaw dihang mibisita si Stanly sa balay nila ni Tess, nananghid kaniya ang inahan sa dalaga. “Dong, ayaw lang kalain ha, duna man gud kami’y gipatrabaho sa among baul sa pikas bukid, kinahanglan nga amo g’yud nga bantayan aron dili magtinapolan sa ilang trabaho. Kamo na lang si Tess ang mahabilin dinhi sa balay, pag-ayo-ayo mo.”

Taud-taud human makatalikud ang mga ginikanan sa dalaga, mitupad sa paglingkod si Tess kang Stanly nga naglantaw sa bentana paingon sa kinaubsan.

“Unsa bay imong gihinuktokan Stanly?,” matud ni Tess dayong agbay sa abaga sa ulitawo. Wala tuyoa nga nabag-id ang dughan ni Tess sa buko-buko ni Stanly. Nakasugnib kini og kainit sa kalawasan ni Stanly. Gilingi niya si Tess ug mao g’yuy nabantang niini ang mga ngabil sa dalaga.

Nagkatinutokay silang duha. Taud-taud wala nila damha nga nagtagbo na ang masi’g nila ka mga ngabil. Mainampingon nga gigakus ni Stanly ang dalaga ug sa unang higayon nagkadikit ang ilang kalawasan.

“I love you Stanly,” matud ni Tess nga daw mitugyan na sa iyang lawas ngadto sa ulitawo. (Sumpayan)