Anino sa kulto

Gula 217

Mihinay paglakang si Carlo ug mipaduol sa nahagbaan sa supremo. Gitino niya kun patay na ba gyud kini. Nasuta niya nga wala na kini kinabuhi. Gitutokan niya pag-ayo ang nagbuy-od nga lawas sa supremo. Milakdop sa iyang hunahuna ang iyang mga ginikanan. Gikapanimalos ko na gyud sila! Milanog kining mga pulonga sa lawak sa iyang hunahuna.

Pagkilab sa pipila ka daklit, miusa pagtang-on ang butobuto. “Men,” nabati ni Carlo ang tingog ni Lt. Valera nga maoy nangulo sa operasyon sa mga tinugyanan sa balaod. “Search the area.”

Mikiros ang mga polis. Gituman nila ang mando sa tenyente. Niining higayona, namasibas na didto sa subangan, timaan nga nagsingabot na ang kabuntagon. “Wala ka ba maunsa, Sir,” nagkanayon si Lt. Valera nga miduol kang Carlo.

“Wala,” mubong tubag ni Carlo. “Salamat nga nahiabot kamo. Pero abi ko’g patay ka na usab tungod kay gipusil ka man sa mga sakop sa kulto didto sa kuwerpo.”

‘Gisuwerte pa gayod, Sir,” matud ni Valera. “Nakasul-ob ko’g bullet proof dihang gipusil ako sa mga sakop sa kulto. Nakamatikod man gud ko nga may laing sabaw sa puwersa sa PNP dihang nadakpan nimo si Chief mao nga nangandam dayon ko. Nagpapatay-patay lang ko dihang ila kong gipusil. Pagbiya nila sa kuwerpo dala ka nga wala nay panimuot, hilom akong misunod maong natultolan ko kining dapita nga lisod gayod kaayong tultolan sa wala masuheto. Nangayo ko’g panabang sa kapolisan sa silingang lungsod. Maayo gani kay mi-cooperate sab sila.

“Dakong accomplishment mo kini, Tenyente,” ni Carlo pa. “Nagtuo ko nga makadawat ka gayod og promotion tungod niini.”

Igo lang mipahiyom ang tenyente.

Usa ka kauban ni Lt. Valera miduol sa ilang nahimutangan. “May mga stock sa shabu nga among na-recover sulod sa langob, Sir,” taho niini.

Nagkatinan-away sila si Carlo ug Lt. Valera. Apan sa kaisipan ni Carlo dihay milugdang nga kamatuoran. Ang mga Tambayawan ra usab diay maoy nagpayuhot sa ginadiling drugas sa lungsod sa Mabini. Misantop usab sa iyang hunahuna nga malagmit migamit usab si Ramon Diaz sa ginadiling drugas hinungdan nga nawad-an na kini sa hustong panghunahuna ug nahungog sa Satanismo.

“Hiposa ninyo ang tanan ninyong makita nga magamit natong ebidensiya batok sa kulto,” giingnan ni Valera ang polis. -- Taposan sunod gula