Kamatayon sa panumpa

Wala na siya mobalik og paninda sa ilang puwesto sa atubangang bahin sa Metropolitan Cathedral kun diin kaniadto mamaligya siya’g mga pagkaon uban sa iyang inahan. Nangaplay si Xenia og trabaho sa usa ka internet cafe nga nahimutang duol sa usa ka unibersidad sa downtown area sa dakbayan sa Sugbo. Computer literate man siya sanglit computer-related man ang kursong iyang gikuha sa nagtungha pa siya sa kolehiyo.

Nadawat si Xenia sa giaplayan niyang trabaho ug gipasugod dayon siya sa tag-iya sa internet cafe. Minimum ang iyang suweldo.

Maoy plano ni Xenia nga kun makadawat na siya’g suweldo, hinay-hinayan niya’g bayad ang iyang utang sa ospital diin gioperahan si Nanay Lourdes niya. May gipirmahan ra ba siyang promisory note nga iya gyung bayran ang nahibilin niyang utang sa maong tambalanan.

Apan demalas si Xenia. Kay sa ikaduhang semana sa iyang pagtrabaho sa internet cafe, nakadawat ang iyang employer og closure order gikan sa mayor sa dakbayan sa Sugbo tungod kay kulang kini’g mga papeles alang sa pag-operate og internet cafe.

Nawad-an og trabaho si Xenia tungod sa kalit nga pagsira sa internet cafe nga iyang gialagaran. Hinuon, gisuweldohan man siya sa tag-iya niini sa mga adlaw nga iyang gitrabahoan. -- Sumpayan pa