Anino sa kulto

Gula 214

“Mga igsoon,” mipatigbabaw ang tingog ni Ramon Diaz sa kanta sa mga armas nga tag-as og kalibre. “Ang inyong mga armas! Ang inyong mga armas!”

Milihok ang mga sakop sa kulto sa pagkuha sa tagsatagsa nila ka mga armas. Si Ramon Diaz wala mamatikdi nga nahanaw.

Si Carlo Guieb nahikugang sa maong kalit nga hitabo. Apan mipasulabi ang gibati niyang kahinangop. Kinsa man kaha ang nagpabuto? Nakasukot siya sa iyang kaugalingon. Apan wala siya makakaplag og tubag sa pangutana nga iyang gisukna.

Misukol ang mga sakop sa kulto sa mga nanulong. Tag-as usab ang ilang mga hinagiban. Wala sila magpaalkanse sa sinukliay sa mga bala. Daghan na ang mihay-ad ug nakabsan sa kinabuhi.

Mibati’g kahinugon si Carlo sa higayon nga nausik. Kun wala pa siya gaposa, higayon na unta niya kini karon. Apan lisod kaayong badbaron ang malig-ong pisi nga gibalighot sa iyang mga tiil ug kamot.

Taudtaod dihay mga anino nga kalit nangguho gikan sa kangitngit ug mipaduol sa ilang nahimutangan. Nakugang si Carlo. Mga polis ang nahiabot. Maoy nangulo kanila si Lt. Valera.

Gibadbad sa mga polis ang gapos sa mga dinakpan sa mga Tambayawan. Dihang nakabuhi na, si Carlo maoy nagmaniobra pagluwas ni Inday Shantal. Gikoberan siya sa mga polis nga nakigpinusilay sa mga sakop sa kulto.

“Sarge,” gisangpit ni Valera ang polis nga diha sa iyang duol. “Kamo nay bahala nila ni Padre Daniel ug mga kauban. Iseguro sila sa safe nga lugar.”

“Yes, Sir,” sanong sa polis.

Gidala sa upat ka polis sila si Padre Daniel ug mga kauban pahilayo sa dapit diin nahitabo ang pinusilay. Apan nagpabilin si Carlo. Miabag siya sa kapolisan nga nakigsangka sa mga sakop sa kulto.

Si Carlo nahisama sa usa ka leyon nga bag-ong nakagawas sa tangkal, nagbahis pag-ayo. Duha ka armas ang iyang gigunitan, armalite ug .45 kalibre, nga pulos nakuha niya gikan sa mga sakop sa kulto nga napatay sa kapolisan. Walay puas ang iyang pagpabuto. Ang mga kaaway nagkapulikig tago sa kabatoan ug sa mga punoan sa kahoy. Ang rebulto sa mananap nabungkag nga naigo sa iyang pagpusil. -- Sumpayan pa