Saligi ang Ginoo

Mingaw ang palibot sa akong pagsulod sa ikaduhang andana sa edipisyo nga maoy nahimutangan sa estasyonan diin ako nagsibya. Gitan-aw ko ang akong relo de pulso ug nagtug-an nga alas 8 na ang takna sa gabii ug tukma usab sa oras sa pagsulod sa gidumala kong programa sa kahanginan. Dugay na ako nga nagsibya sa maong sibyaanan apan sukad karon ko lang nasinati nga daw gibati ko ang hilabihan nga kamingaw sa palibot.

Gibundak ko ang    akong mga tiil sa pagtikang sa matag ang-ang sa hagdanan sa tuyo nga ang hinagtok sa akong mga tiil maoy makasiak sa kamingaw sa palibot sa paghiklin sa gibati kong gamay nga kahadlok.

Semana Santa na usab ug nakapahinumdom kanako ang maong bililhong mga adlaw sa pagpanggawas sa mga panuway sanglit gisaulog usab nila ang maong adlaw sa ilang kadaugan diin gihukman si Ginoong Hesukristo sa silot nga kamatayon.

“Sa matag adlaw sa Semana Santa,” ni Lolo Tomas pa nga akong apohan nga nakig-estorya kanamo nga iyang mga apo sa gagmay pa kaming mga bata. “Dili maayong molakaw gawas sa panimalay ilabi na sa panahon sa gabii.

“Kay ngano man diay, Lo?” nakapangutana si Andot ngadto sa among apohan.

“Mao kanang panahona nga manggawas ang mga halas ug uban pang malaa nga mananap nga binuhi og mga panuway.” Daling tubag sa among apohan. “Giisip usab nila nga kadaugan ang among mga adlaw kay nagmalampuson man sila sa ilang tinguha nga si Ginoong Hesukristo ilansang sa Krus ug silotan sa kamatayon.

Sa wala pa kami mangatulog iyang gitunol kanamo ang habak nga matud pa niya panguntra sa panuway sa higayon nga mobati kami og kahadlok. 

“Tipigi kana ninyo ug ablihi lamang kana sa higayon nga inyong ikahinagbo ang giingon kong dili ingon nato,” nagkanayon si Lolo Tomas kanamo.

Nahidangat na ako sa sulod sa announcers booth ug nangandam alang sa pagsugod sa akong pagsibya sa kahanginan. Milingkod ako atubangan sa mikropono ug nakita ko ang akong kaugalingon sa screen sa computer dihang nabantang akong kaugalingon sa camera nga maoy timailhan nga worldwide ang akong broadcast sa maong sibyaanan.

Dihang magsugod na unta ako sa akong pagsibya sa kahanginan wala ko lamang damha nga nakita ko ang babaye nga nabantang usab sa screen sa computer.

Taas iyang buhok ug nagsul-ob kini og lubos puti nga sapot. Milingi ako sa palibot apan wala akoy laing tawo nga akong nakita sa sulod sa announcers booth. Gibalik ko sa pagtan-aw ang screen sa computer ug nakita nga duha na ka babaye nga nag-atubang sa mikropono nga daw nagsibya usab sa kahanginan.

Nanglimbawot akong balahibo nga nakalitan sa akong nakita ug gitawag nako ang technician kinsa dali usab kaayong mipawong sa computer sanglit gibati usab diay og kahadlok sa iyang nakita.

Dugay ako nga nakatulog nianang gabhiona hangtod nga akong nahinumdoman ang habak nga gihatag kanamo sa among apohan dihang gagmay pa kaming bata.

Gihinay ko pag-abli ang habak nga kabilin ni Lolo Tomas. Ug dihang naabli na kini maoy akong nakita ang gilikit nga gamay nga papel ug sa akong paghikyad maoy akong nabasa ang mga pulong nga nagkanayon, “Ayaw kahadlok. Saligi ang Ginoo!” (Katapusan)