Nakita nila ni Carlo nga mihapa sa yuta ang mga tawo nga pulos nagtaptap sa ilang mga nawong. Halos dili mamilok sila si Carlo samtang nagtan-aw sa gibuhat sa mga anti-Kristo. Daw nagpugong sila sa pagginhawa samtang nagpaabot sa sunod nga mahitabo.
Miluhod si Ramon Diaz atubangan sa altar ug gidupa ang mga kamot.
“Ginoong Satanas,” misinggit ang supremo sa kulto sa kinatas-an niining tingog samtang nagahangad ngadto sa rebulto sa mananap nga nahimutang sa altar.
Nangimokgimok ang mga unod ni Carlo pagkabati niya nga gisangpit sa supremo og ‘ginoo’ si Satanas.
“Ikaw ang among agalon, ginoong Satanas,” padayon ni Ramon Diaz. “Andam kaming moalagad kanimo. Ania ang laing bata nga maoy manginahan sa imong kaaway. Ihalad siya namo nganha kanimo, among ginoo.”
Mibarog ang supremo sa kulto. Gikuha niini ang mahait nga baraw. Niining tungora, nagdibal na ang kahiladman ni Carlo sa dili masabot nga pagbati.
Usa ka sakop sa kulto miduol ug gibuksan ang panaptong itom nga gitabon sa lamesa. Naniga ang mga mata ni Carlo. Ibabaw sa lamesa naghayang nga ginapos si Inday Shantal, ang anak nila ni Jimmy ug Arlin. Kalit lang kaayong gisaog ang balatian ni Carlo sa dili masabot nga hurohuro. Mao usab sila si Arlin, Jimmy, Belen, Lexie, Tiyo Berto ug Padre Daniel.
Gihuyad sa supremo ang baraw nga gigunitan niini sa tumang kahugot.
“Ayaaawwww....!!!”
Milanog ang kabang nga tingog nila ni Arlin, Belen ug Lexie kansang galamhan gikabhan sa kalisang -- ang ilang siyagit mialingawngaw sa kalikopan ug misulbong sa ibabaw sa tag-as nga kakahoyan -- dihang ihansak na sa supremo ang baraw nga gigunitan niini ngadto sa dughan sa inosenteng bata.
Halos dungan sa paglanog sa siyagit sa tulo ka babaye nga nangalisang, mitublaw sa kalikopan ang masipang mga butobuto. Dihadiha may mga sakop sa kulto nga nangamatay. Wala ikahinayon ni Ramon Diaz paghansak ang gigunitan nga baraw ngadto sa dughan sa bata nga naghayang ibabaw sa lamesa. Nagkaguliyang ang mga Tambayawan. -- Sumpayan pa