Anino sa kulto

Gula 212

Nagpadayon sila paglakaw nga walay timok subay sa gamay’ng dalandalan sulod sa langob nga gibanwagan sa kahayag sa petromaks. Wala madugay, nahiabot sila sa gawas sa langob. Ilang natukmaan nga hayag ang palibot sa gawas gumikan sa kapid-an ka mga sulo nga gipangdagkotan. Gabii na usab diay ug ang lingin nga buwan mipaso didto sa kawanangan. Ang mga tawo nga pulos nagtaptap sa ilang mga nawong nanag-alirong atubangan sa usa ka altar -- rebulto sa usa ka mananap nga adunay pito ka ulo ug napulo ka sungay. Karon pa makakita si Carlo sa maong matang sa mananap.

Apan ang nakadapit pag-ayo sa pagtagad ni Carlo mao ang taas nga lamesa nga gipahimutang duol sa tiilan sa altar. May gitabonan sa panapton nga itom ibabaw sa maong talad nga sa tan-aw ni Carlo, bulto sa usa ka tawo nga naghayang. Mikuba ang dughan ni Carlo. Dihay katahap nga misapigad sa iyang hunahuna.

Sila si Carlo gitagsatagsa paggaid sa mga sakop sa kulto ngadto sa punoan sa kahoy. Human sila gaposa, mitipon ang maong mga tawo ngadto sa ilang mga kauban nga nag-alirong sa altar. Mao pa masuta ni Carlo kun unsa na kadaghan ang mga Tambayawan. Mikatap lang sila sa hawanan sa gawas sa baba sa langob.

“Padre,” gisangpit ni Carlo si Padre Daniel nga maoy labing naduol niya. “Unsa mang matanga sa mananap kanang anaa sa altar?”

“Simbolo kana ni Satanas, Mr. Guieb,” tubag sa pari. “Mao kana ang giilang ginoo sa mga anti-Kristo.”

Uran-uran, nakita ni Carlo ang usa ka tawo nga nagsul-ob og lubos itom nga sangkad sa tiil ug may tabon gihapon ang nawong. Mibarog kini atubangan sa mga Tambayawan. Unya gikuha niini ang panaptong itom nga gitabon sa nawong niini. Nailhan dayon kini ni Carlo, si Ramon Diaz, ang supremo sa kulto.

Unya, miusa pagsiak sa kalikopan ang basal sa mga agong nga sama sa nagaduyog sa awit sa pagsimba sa karaang mga lumad.

“Mga igsoon,” milanog ang tingog sa supremo. “Sugdan na nato ang seremonyas.” -- Sumpayan pa