Si Lexie misugilon kang Carlo nga sa paghigawas gayod niya sa main lobby sa Sunlight Publications, giduol dayon siya sa duha ka lalaki. Gidut-an og pistola ang iyang kilid mao nga wala siya makalihok. Gipugos siya pagpasakay sa taksi nga naghulat sa usa ka eskina. Ang drayber sa taksi gitionan usab og pistola sa kauban sa duha ka tawo nga nahibilin sa sakyanan. Ang drayber gipatay nila sa ilang paghiabot sa usa ka mingaw nga dapit sa reclamation area.
“Nanakay kami’g speed boat,” matud ni Lexie. “Wala ko magdahom nga anhi ko nila dad-a sa Bohol kay gitaptapan man nila ang akong mga mata.”
Igo lang nakapanglingo si Carlo sa giasoy ni Lexie. Nasuta niya nga giplano gayod ni Ramon Diaz ang tanan. Gusto gayod sa supremo sa kulto nga makuha ang tanan niyang mga mahal sa kinabuhi kay lakip ang iyang hinigugma nga didto sa Cebu gigugolan man gayod nila’g panahon sa pagkuha.
Si Arlin na usab ang gisukitsukit ni Carlo. Nagsusi siya bahin sa bata. Apan nahisagmuyo si Carlo sa pamahayag ni Arlin bahin kang Inday Shantal.
“Wala na ako’y kasayoran kun hain na karon ang akong anak, Gaw, naghilak si Arlin. “Gipalayo nila kanako ang akong anak.”
Daw nahugnoan sa langit si Carlo. Wala na siya masayod kun unsay angay niyang buhaton. Sa unang higayon, mibatig kaluya ang iyang diwa.
Sa milabay’ng kap-atan ug walo ka takna mao ray gihunahuna nila ni Carlo ang pag-ikyas. Apan wala sila makakitag sulbad sa ilang suliran. Ang malig-ong pisi nga gibalighot sa ilang mga kamot ug tiil nagpabiling babag sa ilang tinguha. Gipiog sila sa kaluya. Sa ilang nahinumdoman, kaduha ra sila hatagi’g pagkaon sa mga sakop sa kulto. Badbaran sa gapos ang usa nila ka kamot samtang magkaon. Apan ibalik dayon kini sa paggaid human sila makakaon. Unya, may mga tawo nga misulod sa langob. Gibadbad sa mga sakop sa kulto ang ilang mga gapos. Gipalakaw sila. Apan giabyan sila sa mga disipulo sa Tambayawan nga pulos nagtion sa gibitbit nga mga armas ngadto kanila. Gidumbol si Carlo sa kahibulong. Nakasukot siya sa iyang kaugalingon kun asa sila dad-a sa mga sakop sa kulto. Patyon na kaha sila? May kabalaka nga midugkal sa iyang kahiladman. Apan ang maong kabalaka inanay nga nahilis ug mibanos ang diyotay’ng kahinangop. Sa sangi sa iyang handurawan nakita ang raya sa kahayag nga milusot sa gamay nga lungag. -- Sumpayan pa