Love at First Sight

“Unsa nang imong dala Wel?” gipangutana ni Daylen si Lowel dihang misulod na sa kwarto sa ospital. Sila ra gihapong duha kay ang inahan ni Daylen wala mobalik gikan sa ilang balay ug ang inahan ni Lowel tua pa gihapon sa operating room.

“Sige, tabangan tika pagbangon Len para makakaon ka na,” may pagka mapinanggaon ang tingog ni Lowel ngadto sa dalaga. Mitutok kaniya si Daylen sa salabtunong tinan-awan.

Nagdungan silang duha sa pagkaon. Samtang si Lowel nanghipos sa ilang gikan-an, mitutok na usab si Daylen kaniya. “Kanindot unta kun ang akong mahimong hinigugma ingon og batasan kanimo Wel,” ni Daylen.

Nahalingi si Lowel kang Daylen. Gitutokan niya ang dalaga. Dayon iyang gigunitan ang kamot niini. “Nangandoy usab ko nga ang akong ikauban sa tibuok kinabuhi sama kanimo kaanyag Daylen ug hilomon usab.” Nagkatinutokay silang duha samtang padayong gigunitan ni Lowel ang kamot sa dalaga. “I Love You Len,” ni Lowel pa nga wala gayud makapugong sa iyang gibati.

Nakapahiyom si Daylen. Apan wala siya motingog. Wala usab niya kuhaa ang iyang kamot nga padayong gigunitan sa ulitawo. “Dawaton mo na ba ang akong gugma Len?” gisukna ni Lowel ang dalaga.

Motubag na unta si Daylen apan kalit lang mibukas ang pultahan. Ang inahan ni Daylen ang miabut. Nakit-an g’yud niini nga naggunit pa si Lowel sa kamot sa dalaga.

“Nagdala ko’g makaon para nimo Daylen,” matud sa inahan. “Nakakaon na ko Ma, gipalitan ko ni Lowel og init nga sabaw,” tubag ni Daylen sa iyang inahan.

“Uy, kabuotan gud nimo Dong. Salamat kaayo ha?” giingnan ni Mercedes ang ulitawo. Gihangyo ni Daylen ang iyang inahan nga mopalit og prutas. “Hala anak, wala na man ang akong pitaka nga gisudlan sa kwarta.” Nananghid si Manang Mercedes nga mobalik sa ilang balay kay aron pangitaon ang iyang pitaka. Mibalik ang kamingaw sa kwarto. Gitutokan pag-usab ni Lowel si Daylen.

Gikuha ni Lowel ang face towel nga gigamit niya pagpabugnaw sa agtang sa dalaga dihang misaka ang hilanat niini kaganinang kaadlawon. Gikusohan niya sa lababo.

“Dali Len, trapohan nako ang imong nawong ug bukton,” ni Lowel nga migunit sa abaga sa dalaga. Human matrapohi ni Lowel ang nawong ug bukton sa dalaga, takulahaw lang gigunitan ni Daylen ang iyang bukton. “Dali ka ra kaayo higugmaon Wel. I love you too,” ni Daylen pa nga mitutok kang Lowel. Gihagkan ni Lowel ang dalaga. “Salamat Len nga wala nimo pakyasa ang akong gugma.

“Ampingi baya g’yud ang akong gugma para lang kanimo Wel. Ambot bitaw, dali ra kaayo ko nga na in-love nimo,” walay lipud-lipod nga giangkon ni Daylen ang iyang pagbati sa ulitawo. (Sumpayan)