GULA 209
Wala motingog si Carlo. Nakahinuktok siya sa gipamulong sa pari. Alang kaniya, kadto maoy tinuod nga matuod. May kamatuoran nga dili kadudahan. Kamatuoran nga maghatag og kagawasan sa hunahuna sa tawo gikan sa tanang mga kalibog.
Nanglabay ang mga takna. Ang tiyan ni Carlo mihilak sa tumang kagutom. Mao usab sila si Tiyo Berto, Belen, Jimmy ug Padre Daniel. Sukad sa ilang paghiabot dinhi sa langob, wala pa gayod sila hatagi’g pagkaon. Sa banabana ni Carlo, mga duha na ka kan-anan nga wala sila makakaon. Sila si Belen, Jimmy ug Tiyo Berto mireklamo nga nag-anam na sila’g kaluya. Wala makamatikod si Carlo nga nagmulo si Padre Daniel. Ingon sa hingpit na lang niining gitugyan sa Dios ang ilang kapalaran.
Sa iyang bahin, si Carlo nakabatyag na usab og diyotay’ng kaluya. Apan li-gon siya’g diwa. Wala siya magpadaog sa bitad sa kaluya. Gilagsik niya ang iyang hunahuna. Sa ilang kahimtang, mosamot nga wala na sila’y dag-anan kun magpapiog sila sa kahuyang. Do or die, niya pa sa hilom. Basta dili gayod siya moangka sa mga kalisdanan.
Dihay kahayag sa petromaks nga misulod sa langob. May mga tawo nga nagsingabot sa ilang nahimutangan. Mikuba ang dughan ni Carlo. Naseguro niya nga mga sakop sa kulto ang nagsingabot. Nakasukot siya sa iyang kaugalingon kun unsa kahay tuyo sa mga Tambayawan kanila.
Nanghunong ang mga sakop sa kulto sa igong gilay-on. Dihay usa ka tawo nga miuna pagduol kang Carlo. Si Ramon Diaz. Misunod sa supremo ang nagbitbit sa petromaks.
“May surpresa ako alang kanimo, Mr. Guieb,” nagkanayon si Ramon Diaz.
Wala motingog si Carlo. Gitutokan niya og hait ang supremo sa kulto.
“Dad-a ninyo sila diri,” mando sa supremo sa iyang mga disipulo.
Diha-diha may duha ka anino nga giguyod sa mga sakop sa kulto paduol sa gigaposan kang Carlo. Ug misiga ang iyang mga mata ug mitingkag ang iyang mga dalunggan dihang natandangan sa kahayag sa petromaks ang duha ka binuhat nga ginapos. Sila si Arlin ug Lexie Orioque! -- Sumpayan pa