Anino sa kulto

Gula 206

“Belib kaayo ko nimo nianang bahina, Mr. Diaz,” nagkanayon si Carlo nga ingon sa nakadayeg sa kaigmat sa kaaway. “Maayo ka kaayong modalag takoban. Wala gayod ako magdahom nga ikaw ang supremo sa kulto tungod kay sa atong panag-uban, wala man gayod ako makamatikod nga may katingad-an kang mga lihok.”

“Gigamit ko lang ang akong utok,” ni Diaz nga nakahigayon sa pagpagawal. “And I’m a lot wiser than you tungod kay ania na man sa akong mga kamot ang imong kinabuhi.”

“Tinugyanan ka sa balaod, Mr. Diaz. Nasayod kang sayop kining imong gibuhat. Ayaw na dugangi ang mga salaod nga imong nahimo.”

“Walay mahimo ang inyong balaod batok kanako, Mr. Guieb. Hinuon, kaming mga Tambayawan ang magmadaugon. Kami ang maghari sa kalibotan.”

“Gukdonon sa balaod kining inyong kalihokan. Naghimo kamo’g heinous crimes nga may tugbang nga bug-at nga silot.

“Kini tungod kay wala hisabti sa inyong balaod ang maayong tumong sa Tambayawan Black Brotherhood. Apan kun kami na unya ang maghari sa kalibotan, gawasnon na kaming mohimo sa tanan namong gustong himuon. Mouswag ang panginabuhi sa katawhan tungod kay modagsang man unya ang mga negosyo nga dinagko ang kitaon sama sa gun smuggling, drug trafficking, child prostitution ug uban pang negosyo nga gigukod karon sa inyong balaod. Modagsang ang jueteng ug uban pang illegal nga sugal nga wala na unya’y balaod nga mogukod.”

“Mao diay kana ang giingon mong maayong tumong sa inyong kulto?” May pait nga tamihid nga nanambo sa panagway ni Carlo. “Kaayohan ba diay ang ikadulot nianang tanan? Wala ba ninyo hunahunaa ang mga kadaot nga mahimo niini sa katilingban? Wala ba ninyo hunahunaa kun pila ka kinabuhi ang malaglag tungod nianang maong buhat ug ang mahimong linugdangan kun mokaylap ang mga daotang buhat dinhi sa kalibotan? Daghang kinabuhi ang maamong ilabi na sa mga batan-on nga mahingag sa drugas.”

“That’s life, Mr. Guieb,” nagkanayon si Ramon Diaz. “Life is a battle ug sa bisan unsang gubat aduna gayo’y casualties.” “You are only looking at one side of the coin, Mr. Diaz.”  -- Sumpayan pa