Kamatayon sa Panumpa

Gula 27

Kinsa pa bay angay niyang duolon? Wala na siya’y nahunahunaan nga laing kadangpan. Wala na siya’y nahunahunaan nga laing paagi.

Unya, misantop na usab sa iyang hunahuna si Gordon. Naghinuktok siya sa makadiyot. Unya, nakahukom siyang makigkita pag-usab niini. Me-decide siyang ipaubos ang iyang garbo... maluwas lang ang kinabuhi sa iyang inahan!

Bahala na! Didto molanog kining maong mga pulong sa sulod sa kaisipan ni Xenia. Total, dili na man ko virgin. Dili na big deal kun makig-one night stand ko ni Gordon. Ang mahinungdanon mao nga maluwas ang kinabuhi ni Nanay Lourdes!

Tuod man, mibalik si Xenia sa presinto sa kapolisan nga gialagaran ni Gordon. Nakugang si Gordon sa iyang paghiabot. Nagsultihanay sila sa usa ka dapit sa presinto nga dili sila madungog sa ubang mga polis.

“Pilay imong ibayad nako kun mosugot kong makig-one night stand nimo?” Nangutana si Xenia.

“Ngano man?” Gikan ni Gordon. “Nakahukom ka na pagdawat sa akong tanyag?”

“Tungod ug alang sa kaluwasan sa kinabuhi sa akong inahan, mosugot ko sa imong gikondisyon. Wa na koy choice.”

“Good! Maayo kay nakadesisyon ka na.”

“Gusto kong masayod daan kun pilay imong ibayad nako.” -- Sumpayan pa