Anino sa Kulto

“Mao kini ang matuod kong panagway, Mr. Guieb. Apan ang ngalan nga inyong nailhan nga mao ako dili mao ang matuod kong ngalan.”

“Unsay buot mong ipasabot?”

“Dili ako si Dick Campo. Ang matuod kong ngalan mao si Ramon Diaz.”

“U-unsa?” tuaw ni Carlo nga ingon sa dili makatuo. “Oo,” maoy tubag. “Akong manghod si Korporal Delano Diaz, ang police scalawag nga imong gipatay didto sa Cebu.”

Wala makatingog si Carlo. Maglisod siya pagtuo sa iyang nasayran. Wala siya magdahom nga igsoon diay ni Korporal Diaz ang supremo sa Tambayawan Black Brotherhood. Karon pa siya makasabot sa tanan. Natubag na ang mga pangutana nga gisukna niya sa iyang kaugalingon mahitungod sa misteryo nga iyang giatubang.

“Karon nga nasayod ka na sa matuod,” namulong si Ramon Diaz, taliwala sa iyang kahilom, “nakasabot ka na tingali kun nganong miingon ako nga dako ka kaayo’g sala kanako nga kinahanglang bugtian mo sa imong kinabuhi.”

“Nakasala sa balaod ang imong manghod, Mr. Diaz,” nagkanayon si Carlo nga maisugong nangatarongan. “Siya’y nagpatay sa akong manghod nga si Jerome. Protektor usab siya sa illegal nga negosyo ni Mr. See.”

“Igsoon ko siya, Mr. Guieb,” lag-it kaayo’g tinan-awan si Ramon Diaz kaniya. “Bisan unsa pa siya kadaotan magpabilin kaming managsoon tungod kay managsama ang dugo nga naglatay sa among kaugatan. Sakit kaayo alang kanako ang nahitabo kaniya.” “Amanos lang kita, Mr. Diaz,” matud ni Carlo. “Kun gisakitan ka sa nahitabo sa imong manghod, sakit usab alang kanako ang kamatayon sa akong manghod. Kun tukion gani pag-ayo, ikaw hinuon ang dako kaayo’g atraso kanako tungod kay gipatay mo ang akong mga ginikanan ug iyaan. Gilakip mo pa ang kauban nakong detektib.”

“Napagan lang sila sa akong kasilag kanimo,” matud ni Ramon Diaz. “Didto ako sa kaulohan kay gipatawag sa heneral dihang gipatay mo ang akong igsoon. Pagkasayod nako sa maong hitabo, nangita dayon ko’g paagi nga makapahungaw sa gibati kong kayugot. Mao kadto nga akong gitumba ang usa ninyo ka kauban.

Wala motingog si Carlo. Apan dihay nagpanglugnot sa iyang kahiladman. -- Sumpayan pa