Anino sa kulto

Gula 200

Nahilom si Carlo. Iyang gihinuktokan ang tanang gipanulti ni Padre Daniel. Unya dihay iyang nahinumdoman nga ingon sa nakapahasol sa iyang konsensiya.

“P-pasayloa ko, Padre Daniel,” nagkanayon si Carlo sa tingog nga matataw ang diyotay’ng pagkurog.“Tungod sa daotan kong pagtuo mahitungod nimo,” ni Carlo pa.

“Daotang pagtuo?” sa pari pa. “U-unsay buot mong ipasabot?”

“Nagtuo ko nga may kalabotan ka sa pagdagit nila ni Arlin ug Inday Shantal,” mipasabot si Carlo. “Ikaw ra man gud ang gitug-anan ni Tiyo Berto kun hain sila. Misamot ang akong katahap nga sakop ka sa kulto dihang wala ka sa kombento sa among pag-adto ug walay usa sa imong mga kaabag nga nahibalo kun hain ka.”

“Mao ba?” mubong tubag ni Padre Daniel. “Gidagit usab diay sa mga Tambayawan sila si Arlin ug ang bata?”

“Oo, Padre,” mubong tubag ni Carlo. “Natultolan gayod sa mga sakop sa kulto ang gitagoan sa inahan ug anak.”

“M-my God,” tuaw sa pari nga daw gikumhan sa kahingawa.

“Nailhan ko na ang supremo sa kulto, Padre,” tug-an ni Carlo.

“H-ha?” sa pari pa nga ingon sa nakalitan. “K-kinsa, Mr. Guieb? Kinsa ang supremo sa kulto?” Gitug-anan ni Carlo si Padre Daniel nga si Maj. Dick Campo mao ang supremo sa Tambayawan Black Brotherhood. Gipasabot niya ngadto sa pari kun giunsa niya pagkadiskubre sa tinagoan sa pagkatawo sa hepe. Daw sa dili makatuo ang pari sa iyang giasoy.

“Wala gayod ako magdahom nga siya ang supremo sa kulto,” matud ni Carlo. “Maayo kaayo niyang pagkatago ang iyang kaugalingon. Mao diay nga masayran gayod sa kulto ang tanan nakong mga plano kay ang tawo nga akong gisaligan nga makatabang kanako mao man diay hinuon ang tawo nga gusto nakong dakpon. Gigisa niya ako sa kaugalingon kong mantika.”-- Sumpayan pa