Kamatayon sa Panumpa

Gula 21

May gamay silang tinigom gikan sa ilang kinitaan sa pagpanindag mga pagkaon apan kini dili paigo bisan sa pasiunang bayad lang sa tambalanan. Naglibog si Xenia kun asa siya mangitag kuwarta nga ikabayad sa ospital aron maoperahan.

Ang kapait sa kahimtang nga kabos nabatyagan na pag-ayo ni Xenia karon nga nag-ungaw sa kakuyaw ang kinabuhi sa iyang inahan. Kinahanglang maoperahan sa labing daling panahon ang iyang Nanay Lourdes. Busa, kinahanglang mangita dayon siya’g kuwarta nga ikabayad sa ospital.

Napugos si Xenia pagbiya sa tambalanan bisan walay laing makabantay sa iyang Nanay Lourdes. Kinahanglang makakita siya’g kuwarta nga ikahatag isip pasiunang bayad sa tambalanan. Kinahanglang maluwas ang kinabuhi sa iyang Nanay Lourdes. Kinahanglan gayod!

Nahasiril-siril si Xenia. Nahapangka-pangka siya sa pagpangita’g kuwarta. Giduol niya ang iyang mga higala sa pamasin nga makahulam siya’g kuwarta. Apan pulos balibad ang iyang nadawat. Hinuon, dihay nakasugyot kaniya pagduol sa charitable institutions aron mangayog hinabang.

Nangahas siya pagduol sa buhatan sa PCSO. Mihatag og ayuda kaniya ang maong buhatan apan kulang pa gihapon ang kantidad nga gihinabang sa PCSO alang sa pasiunang bayad sa tambalanan. Maayo gani kay may nakasugyot niya pagdangop sa media. Nahatagan sab siya’g hinabang sa The Freeman Foundation ug sa kagamhanang lokal sa dakbayan sa Sugbo. -- Sumpayan pa