Anino sa Kulto

Midali sila sa pagpanggawas aron pagsusi kun unsay nahitabo. Maoy ilang nasugatan ang nanagmaskarang mga tawo nga pulos armado. Mihagba dihadiha sila si Lt. Valera ug ang sarhento. Si Carlo gidis-armahan sa usa sa mga lalaking nanagmaskara ug daling giposasan. Wala makalihok si Carlo nga nakalitan sa hitabo.

Sa misunod nga mga gutlo, mao na lamay namatngonan ni Carlo nga nakagawas na si Maj. Campo sa bilanggoan. Nagkatawa kini nga miduol kaniya. Nagbitbit kini’g pistola. Niining higayona, gitabangan si Carlo paggunit sa duha ka tawo nga maskarado.”

“You have me, Mr. Guieb,” mahimut-on ang hepe nga mipikpik sa iyang abaga. “But I know you cannot shoulder the responsibility. Danghag ka nga pagka-detektib. Kulang ka pa sa taktika. Wala kay kasayoran nga daghan na akong mga disipulo nga mga sakop sa PNP.”

Gumikan sa gibating kalagot, milugnot si Carlo aron unta hasmagan ang hepe nga nagkatawa sa iyang atubangan. Apan kusgan ang duha ka tawo nga nagkupot kaniya. Ug nalimot siya sa kalibotan dihang nasabak sa iyang nawong ang makusog nga pagbunal ni Maj. Campo sa puloan sa pistola nga gigunitan niini.

Diha na si Carlo Guieb sa usa ka mangitngit nga dapit sa dihang gibalikan siya sa maayong panimuot. Tumang kangiob ang mitimbaya sa iyang mga mata dihang iya kining gibuka. Buot siyang molihok apan iyang nasuta nga ginapos siya. Hugot nga pagkabaat sa pisi nga kuralon ang iyang mga kamot ug tiil. Nabatyagan niya nga misakit ang iyang apapangig.

Nahinumdom dayon si Carlo sa nahitabo kaniya. Giluwas si Maj. Dick Campo sa mga disipulo niini nga sakop sa PNP. Nausahan siya sa hepe niining bahina. Wala siya magdahom nga may mga polis na diay nga nagpasakop sa kulto. Gipatay sa mga disipulo sa hepe ang mga polis nga dili sakop sa ilang kalihokan. Siya ray gibuhi sa mga Tambayawan. Kun nganong wala siya apila sa pagpatay, kana maoy wala niya hisabti.

Apan hain man sila si Maj. Campo? Nangita ang iyang hunahuna sa hepe ug sa mga kauban niini. Namatikdan man gud niya nga nag-inusara siya sa dapit nga iyang nahimutangan diin pulos kangitngit ang nagpalibot kaniya. Bagtok ang kahilom sa maong dapit nga tugawon lang sa panagsang tinulo sa tubig. -- Sumpayan pa