Mangangawot og bulawan

Dauban ko ba nang imong Crosswind! Ilisan nako’g Fortuner! Nahinumdom si Lito sa gwatsi nga hinambog ni Noy Rudy samtang nagsud-ong siya sa naulahi nga puwerte nang dauta. Giubo-ubo nga morag may sakit sa baga. Nabawog ang bukobuko ug nanglawom ang balikhaw. Wa kapangloto og tarong sa tindahan niya og mami daplin sa karsada sa Escario. Dako unta siyag kitaon kay suki niya ang mga empleyado sa Call Center nga 24 hours ang serbisyo. Unsaong nahinag man sa pagpangawot og treasure. Nia karon si Noy Rudy suod sa bupete ni Lito. Naglingkod ang tiguwang ning buntaga sa lingkuranan dikit sa tuong habig sa lamesa sa manlalaban. Magpahimo siyag complaint kay duna siya’y ikiha.

Sa yano lang nga pangita ni Noy Rudy nakatigum siyag dos milyones ka pesos sa napulo ka tuig niyang paninda. Apan wa dangtig tuig nahurot kini. Nahanaw daw aso. Wa man god siya patoo sa higala niyang abogado. Si Lito sa wa pa naabogado onse anyos siyang mensahero sa bupete ni Atty. Anton Perez nga duol ra sab sa tindahan ni Noy Rudy. Nasuki sab ni Lito si Noy Rudy. Maong pagkaabogado ni Lito human sa onse ka tuig nga working student, suod na kaayo silang managhigala. Pagpasar ni Lito sa bar exams, nahimo dayon siyang partner ni Atty. Perez. Siya dayon ang gipiyalan sa katunga sa mga kasong gihuptan ni Atty. Perez, nga semi retire na.

Biyudo na si Noy Rudy ug nag-inusara na lang sa iyang balay sa baryo Kintolimbo ning dakbayan. May anak unta siya nga usa. Si Trixia, dalaga na. Apan wa na siya masayod kun hain na. Sukad nakigtaban sa iyang uyab, wa na gyud siya'y balita kun naunsa na iyang pagkabutang. Iya na lang ginayanaya iyang kaguol. Kay wa man siya’y mahimo. Niya pa, kun husto na’s balhibo ang langgam, kalupad na ug mobiya na man gyud sa salag.

Dihang nangabot sa balay ni Noy Rudy ang tulo niya ka pag-umangkon gikan sa Mindanao, nga mga treasure hunter, nahinag dayon ang tiguwang sa pangawot og bulawan. Pakitaon lang siya’g mga sinaw nga bato kunohay tilimad-on nga hapit na gyud maabot ang linubong nga bulawan sa panahon ni Yamashita, modugo dayon. Mohatag dayon siyag kuwarta sa iyang mga pag-umangkon aron siging gastohon sa kahimanan ug kunsomo sa mga nangawot. Wa gyud siya masayod nga gihimo lang siyang gatasan sa iyang mga pag-umangkon.

"Matay Lit, siyen mil pesos na may akong nagasto sa kawotkawot, wa pa man gyud makawoti ang bulawan!" ni Noy Rudy usa ka higayon nagkahinabi sila. "Ako pa nimo Noy Rudy, kay giisip man tikang amahan, labi na nga wa koy ginikanang nailhan kay sinagop lang kono ko, ug langyaw lang ko dinhi, undangi na nang kawotkawot. Isipa lang nga napildi ka sa sugal. Kay kun di ka moundang, seguradong hurot gyud imong kuwarta" ni Lito. Mamid-ok lang ang tiguwang. Unya mangomedya dayon sa iyang sakyanan nga dauban. Mokatawa lang si Lito.

"Wa gyud ka masayop Lit. Hurot gyud akong kuwarta. Wa koy ikabayad sa imong serbisyo," ni Noy Rudy. "Tagai lang unya ko’g usa ka gold bar kun makawotan na" ni Lito. "Segurado! Bisag napulo pa," ni Noy Rudy. Dako gihapon siyag paglaum nga makakawot iyang mga pag-umangkon. "Gisaysay ko na diha sa imong affidavit-complaint nga giharabas tanan nimong mga tanom ug halaman libot sa imong balay. Ang nagharabas ang tag-iya sa yuta nga gitarukan sa imong balay. Kay nasuko diay siya nga wa ka pa kaimpas sa inyong sabot nga presyo sa yuta" ni Lito. "Wa lagi. Kay naabtan sa tinghuwaw", ni Noy Rudy.

Gitunol sa abogado ang gipirmahan ni Noy Rudy. Ginotaryohan ni Lito. "Ikaw nalay bahala sa filing fee ug ubang bayranan sa husgado," ni Lito. "Ako lang Lit. Naa pay mga ginagmay nakong halin og mami", ni Noy Rudy. Nalooy kaayo si Lito sa tiguwang. Bisag ulitawo siya, apeke pa man sab siya. Kay nagbayad man siya’s financing sa iyang Crosswind. Igo nalang nang niserbisyo siyag libre sa higala.

Paglakaw sa tiguwang nga nagdala sa papel, gisundan og tan-aw ni Lito ngadto sa gawas. Nakapanglingo siya. "Imbis nga bayran niya ang datahan sa iyang yutang gidatadatahan, tua man hinoon siya nagdata sa mangangawot og bulawan!" tuaw ni Lito sa hilom. Apan di niya kamahayan ang tiguwang sa iyang sayop. Ang higala, higala man gyud. Bisan magkinaunsa pa. (Kataposan) (Kadtong magbabasa nga gusto’g libreng konsulta, dad-a ning pahina sa opisina sa tagsulat. Iatol og Sabado)