“Kadiyot ra kaayo. Please...”
Wala na magdaghan og kuti-kuti si Xenia. Paghikanaog nila sa escalator, migawas sila si Xenia ug Gordon sa department store. Misulod sila sa usa ka outlet sa Jollibee. Ug samtang sila nangaon, mipadayag si Gordon sa tuyo niini kaniya.
“I love you, Xenia,” walay pag-ukon-ukon nga giluwatan ni Gordon ang maong mga pulong sa atubangan sa dalaga.
Napahunong sa paghungit sa pagkaon si Xenia. Nakalitan siya sa gisulti ni Gordon. Wala siya magdahom nga makahigayon ang palikerong polis sa pagpangulitawo kaniya.
“May paglaom ba ang akong gugma, Xenia?” Sukit ni Gordon pagkilab sa pipila ka gutling.
“Mahimo bang dili ko nimo bugalbugalan?” Gikan ni Xenia.
“Tinud-anay ning ako.”
“Minyo ka na. May asawa ka ug mga anak.”
“Biyaan ko ang akong pamilya kun imo kong sugton. Kita nay mag-ipon.”
“Nakamenos ka man tingali nako?”
“Xenia...”
“Nagtuo ka tingali nga hungog ko nga pagka-babaye nga mopatol sa binuang nimong mga plano?”
“I-I’m sorry, Xen. Pero naingon ko niini tungod sa dako kong gugma nganha nimo.”
“Igo na. Di na ko gustong maminaw nimo.” -- Sumpayan pa