Di na ko makiglalis

Sa sige nakog sakay'g taksi, gikan sa amoa ngadto sa among trabahoan, nahibalo na ko sa normal nga plitehan. Kun dili P72, o P74 ngadto sa P78 ra kutob. Dinhay kusog kaayong ulan nga nanawag mig taksi. Sa akong dinalidali, wala na ko motan-aw sa metro. Milahos lang ko’g lingkod nga wala na magpakabana. Gianod man god akong hunahuna sa kahadlok-nga basig ma-late ko. Anaa ra bay dakong premyo kaming mga empleyado kun sa unom ka bulan, kami dili ma-late ug dili sab mo-absent.

Tayming ang akong pag-abot. Kay pagtan-aw ko sa akong relo, menus singko pa sa dili pa magsugod ang akong duty shift. Gibayran kog P80 ang taxi driver. Naunsa ba, nga giingnan man kong kulang pa kuno?

"Boss, P120 ang nakatatak, oh." Niini pa nga mitudlo sa metro.

Wala nako siya paminawa. Sobra man gani'g P2 akong gihatag niya. Unya di pa siya kontento. Pastilan, di man gyod modawat ang kagwang. Manaog bitaw ko nga walay pliteplite. Da, tagbaw lagig apas ang bentahoso!

Giabot og kahadlok ang drayber dihang giduol siya sa among sikyu ug sa mga augmented military nga naasayin sa among trabahoan. Ako man god silang gisultihan sa hitabo, diin pulos nainat ang mga kilay pagkahibawo sa hinungdan.

Gilista sa among guwardiya ang ngalan sa taksi, plate number, kolor sa sakyanan ug ang ngalan mismo sa drayber. Gibuhatan nila kini’g report ug nagpaabot sa hukom kanus-a ko iduso ang akong reklamo sa LTO.

Tulo ka adlaw pa lang gani ang nakalabay, mibalik na ang drayber sa among trabahoan ug nangayo’g pasaylo.

"Boss, please lang ... dili na lagi ko mousab. Mor pa, oh! Niini pa nga miporma’g krus sa iyang duha ka tudlo.

Haskang pakiluoy sa drayber, uy. Hapit nalang god kini moluhod sa akong atubangan.

Unya, miawit og 'Faithfully' akong selpon. Gipindot ko ang phone mode ug gikahinabi ko ang nanawag -- si Direktor diay sa LTO, kumpare nako.

"Pwerteng pakiluoy anang draybera diri sa among opisina, Pre.Kay gawas nga suspensohon ko siya’g usa ka bulan, ipaseminar pa gyod nako siya’g usa ka semana. Gidad-an pa kog bata niya diri, Pre, nga iyang gikugoskugos. Matud niya, unsa na man lang nya kunoy ipalit niya’g gatas sa iyang anak kun imbargohon nako iyang lisensiya. Aw, dia gyod sa among office iyang lisensya. Mauli lang kini kun imo siyang pasayloon. Kay mao man nay gi-instrak ko niya." Sa suod kong higala nga medyo nagkatawa.

"Mao ba, Pre?" Nako pa nga natakdan. Nakakatawa sab. "Ah, sige, Pre, akoy bala ini. T.Y. na lang sa pagtawag."

Sukad niadto, di na ko makiglalis sa mga badlongong drayber. Nahibawo na man ko sa simpleng tambal nga makaayo sa ilang sakit. (Kataposan)