Kamatayon sa Panumpa

Gula 15

Sa Colon, misulod siya sa usa ka department store. Mideretso siya sa school and office supplies department ug namili og mga pocketbook nga iyang mabasa-basa agi’g pagpalabay sa mga takna samtang magbantay siya sa ilang puwesto sa Metropolitan Cathedral.

Duha ka nobelang pocketbook nga Binisaya ang iyang nagustohan segon sa iyang pagbasa sa synopsis nga nahisulat sa likod nga bahin sa basahon. Ang mga nobelang May Gitakdang Panahon Ang Gugma ug Sugo Sa Kasingkasing nga pulos sinulat ni Uriel Cruz Vallecera maoy iyang napilian. Iya dayon kining gibayran sa counter.

Mogawas na unta siya sa department store sa dihang may mikuhit gikan sa iyang luyo samtang nagsakay siya sa escalator. Sa iyang paglingi, maoy iyang nakita si Gordon, ang polis nga ilang silingan didto sa Quiot.

“Diin ka man gikan?” Nangutana si Gordon.

“May gipalit ko,” mubong tubag ni Xenia.

“Maayo hinuon nga nagkita ta dinhi. Duna koy gustong isulti nimo.”

“U-unsa kana?”

“Mahinungdanon kaayo. Mas maayo tingaling mangita ta’g dapit nga magkasulti ta’g maayo.”

‘Nagdali ra ba ko. Tingalig masuko si Nanay kun madugay ko’g balik ngadto sa among puwesto sa may katedral.” -- Sumpayan pa