Gula 193
“Seguridad sa kinabuhi, Mr. Guieb,” tubag sa hepe. “Gahom ug bahandi. Tanan nga makahatag og kalipay sa tawo niining kalibotan. Nindot og panglantaw ang Tambayawan Black Brotherhood. Magplano ang kadagkoan niini sa pag-ilog sa kagamhanan sa kanasoran sa tibuok kalibotan. Magbutang kami’g opisyal sa tag-as nga mga buhatan sa gobiyerno aron molig-on pagsamot ang pundasyon sa Tambayawan. Gani, may maanindot nang plano ang mga Tambayawan dinhi sa Mabini. Ako ang opisyal nga kandidato sa kulto alang sa pagka-mayor niining lungsora sa umaabot nga piniliay. Sa higayon nga may mga Tambayawan na nga makalingkod sa tag-as nga mga puwesto sa kagamhanan, dili na unya lisud tumanon ang among tinguha sa pagsakmit sa kagamhanan sa mga nasod ug kami na unya ang maghari sa kalibotan.”
“Usa diay ka matang sa underground movement kining inyong kalihokan,” nakaingon si Carlo.
“But not exactly communism, Mr. Guieb,” nagkanayon si Maj. Campo. “Although ang communism ug Tambayawan managsama sa pipila ka aspeto but in the total scope, we are far different than the communists. Dayag ang ilang pag-alsa batok sa kagamhanan samtang ang amo gihimo sa labing hilom ug labing pino nga paagi. Gawas pa, wala kami mosagop sa Marxism. Communism is encouraging rebellions and civil wars. It is both a system of thought, a way of life and a form of government. Lahi ang Tambayawan because we are waging silent warfare against all kinds of morality and spiritualism.
“Apan managsama kamong mga atheist,” ni Carlo pa.
“Aduna kami Dios, Mr. Guieb,” daling tubag sa hepe,” nga mas gamhanan pa kay sa inyong Ginoo.”
Naputol ang ilang panagsulti dihang nangabot na sila si Lt. Valera ug mga kauban. Nangandam si Carlo aron pagpasabot sa mga polis mahitungod sa nahitabo kang Maj. Campo. -- Sumpayan pa