Gula 9
Hingpit nga katagbawan ang natagamtam nila ni Henry ug Doreen atul sa ikatulo nga hugna sa ilang kumbati sa kama.
“Kun mawala ka kanako Henry no, paminaw nako mamatay g’yud ko sa kamingaw ug kaguol,” giingnan ni Doreen ang ulitawo. “Dili kana mahitabo Doreen. Ikaw ang dad-on nako sa altar sa kaminyoon,” dali nga tubag ni Henry.
Midan-ag na ang kahayag sa adlaw dihang nanggawas sila sa Kay Flower Hotel kilid sa Kapitolyo. Gipasakay ni Henry og taksi si Doreen kay dili na kini buot nga makita sa mga gwardya nga may kauban kini sa iyang pagpauli.
Misakay si Henry sa hinuwaman niyang motorsiklo ug mipauli sa iyang gipuy-an. Pag-abut ni Henry sa iyang gipuy-an, mideritso siya’g higda ug nakatulog sa tumang kakapoy.
Didto sa balay nga gitrabahoan ni Doreen, katulgon kaayo ang dalaga apan iya ra kini nga giantos. Milabay ang pipila ka oras. Kalit lang gisanapan sa mga luha ang mga mata ni Henry. Gitalikdan siya ni Doreen. Pag-adto ni Henry sa gitrabahoan ni Doreen sa usa ka subdivision sa Guadalupe, wala na ang dalaga.
Gitug-anan si Henry sa mga kauban sa trabaho ni Doreen nga mipauli ang dalaga sa ilang dapit sa probinsya. Ang nakaproblema mao nga wala masayud ang mga kauban ni Doreen sa pinuy-anan sa dalaga sa probinsya.
Gisuwayan ni Henry pagkontak ang cellphone ni Doreen, apan dili na kini makontak. Mitiyabaw pag-ayo si Henry nga daw usa ka bata nga giilogan sa iyang duwaan. Ang kusog niya nga pagbakho didto sa duol sa gate sa subdivision maoy nakadapit sa pagtagad sa gwardya, kadtong gwardya nga giingong naibog ni Doreen.
“Huy! Naunsa ka? Nganong mihilak ka man diha?” ang singka sa gwardya maoy nakapahigmata ni Henry sa iyang pagdamgo. Apan iya diay’ng ig-agaw nga kauban sa kwarto maoy mipukaw kaniya kay nakabantay nga siya naghilak.
Naghinuktok si Henry makadiyot ug nakapangagho. Diha pa ang kusog nga kulba sa iyang dughan. Dali siya nga naligo ug nag-ilis. Nasigpatan niya sa relo sa bungbong nga alas dos na diay sa hapon. Midali siya pagsakay sa motorsiklo nga wala pa niya iuli sa iyang higala ug midali siya pag-adto sa gitrabahoan ni Doreen.
“Doreen, undang na’g trabaho dinhi ugma dayon. Magkuyog ta’g pauli sa inyong dapit sa probinsya aron pahibaw-on nako ang imong mga ginikanan sa atong gikasabotan nga magminyo na ta,” ni Henry pa.
Nakalitan si Doreen sa gisulti ni Henry. Apan dili siya makabalibad sa gitanyag sa ulitawo kaniya.
“Mga tiguwang na ang akong ginikanan Doreen ug dugay na sila nga gustong magminyo na ko aron makakita sila sa ilang apo. Ako ra’y bugtong manununod sa ilang katigayonan,” matud ni Henry. (Katapusan)