GULA 191
“Dili makataronganon kining gibuhat mo kanako, Mr. Guieb,” nagkanayon si Maj. Campo. “Nalimot ka nga usa ako ka tinugyanan sa balaod? Ako ang hepe dinhi!”
“Wala ako malimot niana,” ni Carlo pa. “Apan nasayod ka na sa hinungdan kun nganong gibanlod ka diha.”
Gitalikdan ni Carlo ang hepe. Mao na usay iyang giatubang ang warden nga niining higayona naglingkod na sa usa ka silya atubangan sa lamesa nga hinimo sa kahoy.
“Kontaka palihog si Lt. Valera, Sarge,” ni Carlo pa. “Ingna nga makigsulti kaniya si Carlo Guieb.”
Mituman ang sarhento sa mando ni Carlo. Kadali ra niining nakontak si Lt. Valera. Daklit nga nagsultihanay ang duha. Unya gihatag sa sarhento ang cellphone niini ngadto kang Carlo. Nagsultihanay sila si Carlo ug Lt. Valera.
“Dia mi karon sa Tangkigan, Sir,” ni Lt. Valera pa sa pikas tumoy sa linya. “Nagsugod na ang among operation.”
“Pamauli kamong tanan karon dayon diri sa kuwerpo, Tenyente,” matud ni Carlo.
“H-ha?” Nakugang ang tenyente. “Pero ngano man Sir? Aw hain man diay si Chief?”
“Dia siya uban nako,” tubag ni Carlo nga nakasabot nga si Maj. Campo ang gipangita sa tenyente. “Ako lay nakigsulti nimo kay may gibuhat siya. Balik dayon mo diri kay nadakpan ko na ang supremo sa kulto.”
“U-unsa?” Tuaw sa tenyente nga ingon sa dili makatuo. “Mao kana,” ni Carlo. “Busa balik na kamo diri aron inyong makita ang supremo sa Tambayawan Black Brotherhood.”
Human sa panagsulti nila ni Lt. Valera, dihay laing misantop sa hunahuna ni Carlo. Gikuha niya ang relong Omega gikan sa bolsa sa iyang diyaket ug gipagunitan kini sa jail warden. May gusto siyang sutaon niini.
“Ngano man diay kini, Sir?” Sa sarhento pa nga midawat sa relo bisan wala makasabot sa katuyoan ni Carlo.
Wala motubag si Carlo. Gikuha niya ang iyang cellphone ug gitulpok tulpok ang keypad niini. Wala madugay, nakurat ang sarhento. Naniga ang mga mata niini nga nagtan-aw sa relong Omega nga mibagting. Ingon sa nahibulong kini sa nasaksihan. -- Sumpayan pa