Kamatayon sa panumpa

May mga higayon nga maghisgot si Nanay Lourdes niya mahitungod kang Kendall. Nahibulong ang iyang inahan kun nganong wala na magpakita si Kendall sa iyang gipuy-an. Wala tug-ani ni Xenia ang iyang inahan nga atua na sa gawas sa nasud si Kendall.

Pulos pangambot ang tubag ni Xenia sa mga pangutana ni Nanay Lourdes bahin sa relasyon nila ni Kendall. Usahay dili na lang niya tubayan ang iyang inahan. Maglisod siya’g pasabot niini sa real score tali nila ni Kendall. Dili niya ikabutyag ngadto ni Nanay Lourdes ang lintunganay’ng hinungdan nganong ingon sa nawad-an og interes si Kendall kaniya.

Aron paglingaw sa iyang kaugalingon, gihimong busy ni Xenia ang iyang kaugalingon. Miabag siya ni Nanay Lourdes sa pagpaninda’g mga pagkaon sa gawas nga bahin sa Metropolitan Cathedral.

Sukad namatay ang iyang amahan nga usa ka panday (nahulog kini sa gitukod nga bilding), kini na ang ilang panginabuhi. Napugos siya paghunong sa iyang pagtuon sa kolehiyo (second year college na unta siya) kay ang kinitaan sa iyang inahan sa pagpaninda’g pagkaon dili makadispaser sa mga galastohan sa iyang pagpadayon pagtungha sa kolehiyo.

Karon giabagan niya ang iyang inahan sa ilang panginabuhi. Namasin siya nga pinaagi niini, mahikalimtan niya si Kendall sa kapulihay. -- Sumpayan pa