GULA 189
Ang nadungog ni Carlo igo nang nakapausab sa tuyok sa kalibotan. Ingon sa dili siya makatuo. Apan klaro niyang nadungog ang gisulti ni Maj. Campo. Kalit lang nalugtab ang iyang pagsalig ngadto sa hepe.
Sa usa ka pagpamilok, kalit gidasmagan ni Carlo ang pultahan sa CR. Wala makalihok si Maj. Campo nga iyang gitionan sa Uzi.
“Sa kataposan,” nagkanayon si Carlo,” nailhan ko na gayod ang matuod nga supremo sa kulto.”
Si Maj. Campo nahalansang sa gibarogan niini, ingon sa wala gayod kini magdahom nga iyang masakpan sa akto.
Hugot nga gigunitan ni Carlo Guieb ang puloan sa Uzi samtang ang sumbohan niini gitumong kang Maj. Dick Campo. Wala siya mamilok nga nagtan-aw sa hepe. Iyang gibantayan ang mata’g gimok sa bisan unsang parte sa lawas niini sa tinguha nga dili malipat ug malingla. Wala na siya mokompiyansa kang Maj. Campo karon nga nasayran na niya ang matuod nga bulok niini. Dili siya makatugot nga mobalit-ad pa ang sitwasyon ug adto na hinuon mopabor sa hepe ang kahigayonan.
“Wala ako magdahom nga ikaw diay ang supremo sa kulto, Maj. Campo,” ni Carlo pa nga ang mga mata wala ibulag sa hepe. “Bisan sa damgo wala gayod ako magtuo nga ikaw ang mabangis nga lider sa Tambayawan nga walay kukaluoy nga mipatay sa mga batang inosente.”
“C-Carlo...” mihana pagduol si Maj. Campo kang Carlo. “Diha ka lang kutob, Maj. Campo, kundili ka buot nga kaugboka’g kandela karong adlawa,” maisogong mibahad si Carlo nga ang tumoy sa Uzi gitumong sa agtang sa hepe.”
Si Maj. Campo ingon sa nakatugkad nga wala siya magtiaw. Mihunong kini ug misibog. Apan wala gihapon mokompiyansa si Carlo.
“Talikod, Maj. Campo,” mimando si Carlo, “ug ipataas ang imong mga kamot.”
“C-Carlo,” se hepe pa. “Mahimo ba nga ato una kining estoryahan?”
“Tumana ang gimando ko kanimo,” ni Carlo pa nga wala magtagad sa hangyo sa hepe. Alang kaniya, dili na angay pamation ang bisan unsa nga isulti sa hepe kaniya. Dili siya gustong mahisulod sa malangong mga lit-ag niini. Busa gibantayan niya ang tanang mga hata niini, sa pulong man o sa buhat.” -- Sumpayan pa