Wa nalimot sa kaayo

Patan-awa kuno ko unsay hitsura anang kuwarta nga Euro, ni Delia ngadtong Abeth.

Bag-o lang silang nahumag kao’g panihapon sulod sa Harbor City sa SM Mall. Nag-atbang sila sa lamesa. Kuyog ni Delia iyang duha ka anak babaye nga sila si Glenda, 18 edad, ug Marjorie, 16. Diha sab ang bana ni Delia nga si Allan, usa ka CPA.

Nag-atbang sila’g lingkod ni Michael, bana ni Abeth. Si Abeth ang katabang sa pamilya ni Delia napulo ka tuig na ang nakalabay. Yaya siya ni Glenda ug Marjorie.

Nanghilak intawon ang mga bata pagbiya sa ilang yaya. Naminyo si Abeth ni Michael usa ka German nga nagpuyo ug nagtrabaho sa Switzerland isip Electronics Engineer. Otso ug sayis pa ang edad nilang Glenda ug Marjorie adtong higayona.

"Ayaw ninyo pungi inyong yaya nga nangita sa iyang swerte" am-am ni Delia sa iyang mga anak adtong higayona. Sa pagkatinood, kun dili pa tungod sa tambag ni Delia, di gyud unta moatubang si Abeth sa German. Sa unang higayon nga nianhi si Michael sa Pilipinas, nibisita siya’s iyang pen pal. Unya dihang nagkahimamat na sila, wa kauyon si Michael. Ug ang babaye wa sab kauyon niya. Nagbuwag silang nagpabiling managhigala.

Dihang nangaligo sa swimming pool sa Uragay, Carmen ang pamilya ni Delia, didto sab si Michael kay gipahimudsan niya iyang higayon isip turista. Unya na-love-at-first-sight siya ni Abeth. Niduol siya ni Delia ug Allan abig maoy ginikanan ni Abeth. Gipailaila sila ni Delia.

Dangtag usa ka tuig nga sinulatay nila ni Michael ug Abeth, nihangyo si Michael nga makigkita sa mga ginikanan sa naulahi. Nagpakitambag si Abeth ni Delia kun unsay angay buhaton.

"Maulaw ko modala niya didto's amo. Pobre kaayo mi. Bukid among gipuy-an sa lungsod sa Apartado. Wa gani mi kasilyas," ni Abeth.

"Swerte nana nimo Abeth. Di makigkita sa ginikanan nimo ang lalaki kun dili pa interesado. Gusto ka ba magpabiling yaya o maid sa tibook kinabuhi? Nalipay ko para nimo sa imong swerte. Kun moadto si Michael sa inyo, pasak-a lang og pension house sa inyong lungsod. Ayaw pahigdaa sa inyo. Igo lang pabisitahon. Nasayod na na siya nga daghang pobreng pamilya sa atong nasud. Mosamot gani tingale iyang kalooy nimo kun masayod siya’s inyong kahimtang" ni Delia.

Balig usa ka tuig, gipaeskuyla ni Delia si Abeth og Culinary Arts.

"At least, duna kay nakamahoan. Kun magminyo namo og dad-on ka’s Switzerland, makatrabaho ka didto’' ni Delia.

Sulod sa siyam ka tuig, wa nay balita si Delia mahitungod ni Abeth. Unya sa niaging bulan, nagkakontakay si Glenda ug Abeth sa internet. Giimbitar si Glenda ni Abeth nga manihapon sa SM. Nagtogon sab si Abeth nga ipadala iyang igsoon ug mga ginikanan.

Pag-abot nila, nihangop pag-ayo si Abeth ngadtong Delia, Glenda ug Marjorie. Giaporan ni Abeth sila’g tagsa ka bag nga puno sa regalo. May mga gamit sa babaye sama sa make-up, pahumot ug mga alahas. Si Allan gihatagan sab ni Michael og usa ka bag nga may mga gamit sa lalaki sama sa after shave lotion ug uban pa, may relo nga mahalon ug pulseras nga bulawan. Pwerteng lipaya ni Allan. Nilamano’g kadaghan ni Michael. Kagaksonon.

Paghuman nilag panihapon, naghinabi. Pito na diay ka tuig nga nagtrabaho si Abeth sa usa ka restawran didto sa Switzerland isip assistant cook. Gipalitan siya og yuta, ni Michael sa poblasyon sa ilang lungsod. Unya gipatukoran og balay alang sa iyang mga ginikanan ug mga igsoon. Wa patampoha sa gastohan si Abeth. Maong ang tinigum niya para lang tabang niya sa iyang mga ginikanan ug mga igsoon. Unya wa gyud siya malimot ni Delia nga maoy nagdasig niya nga makigminyo ni Michael. Wa silay anak. Naglaraw nalang managop og bata.

Nikuot si Abeth sa iyang pitaka. Giaporan niya’g tag 100 Euro sila si Delia, Allan, Glenda ug Marjorie. Nagpahiyom si Michael nga nagtan-aw.

"Lapad man diay ang Euro. Mora sab, og Yen," ni Delia.

Unya giuli nila tagsatagsa ang Euro ngadtong Abeth.

"Ayaw. Inyo na na. Souvenir," ni Abeth. Nagpahiyom.

Wa gyud magdahom si Delia nga nag-ila og utang kabubut-on si Abeth niya. Apan kining iyang gipakita karon, tataw nga wa siya malimot sa iyang gigikanan.

"Sunod ninyong balik sa Pilipinas, ayaw na mo pag-hotel aron makadaginot. Pagteks lang unya kay serbisan ka namo hatud kuha sa airport. May dako sab ming guest room sa balay," ni Delia.

"Salamat daan Nang Delia" ni Abeth. Nipikpik sa abaga sa kahinabi. Wa gyud siya mausab. Maayo lang gihapon og gawi. (Katapusan)