Naluoy si Xenia sa iyang kaugalingon. Sa nahitabo sa relasyon nila ni Kendall, siya’y alkanse kun magkabulag man gayod sila sa hingpit sanglit gikatugyan na man niya ngadto sa lalaki ang iyang pagka-babaye. Sa iya ra bang pangagpas, posible gyud nga mosangpot sa panagbulag ang katab-ang sa ilang relasyon. Iyang nakita nga daw wala nay interes si Kendall kaniya.
Milabay ang lima ka bulan. Si Xenia wala gayod makadawat og bisan unsang kasayoran gikan kang Kendall. Wala na gayod tingali mahinumdom si Kendall kaniya. Misantop sa iyang hunahuna nga gibale-wala na lang tingali ni Kendall ang ilang mga panumpa nga kamatayon ray kinutoban sa ilang paghinigugmaay ug pagminahalay.
May mga gabii nga maghilak si Xenia. Sakitan siyang maghandom sa nahitabo nila ni Kendall-- sa ilang relasyon. Wala siya magdahom nga human sa iyang pagtahan sa iyang kaugalingon ngadto kang Kendall, motab-ang ang ilang pagtinagdanay. Tungod lang sa pagduda sa lalaki nga dili na siya virgin! Dakong sayop ang katahap ni Kendall apan maglisod man usab sa pagmatuod si Xenia nga kini ang unang lalaki sa iyang kinabuhi.
Kay bisan siya mismo wala masayod sa hinungdan nganong wala siya masakiti ug mag-bleed sa unang higayon nga giangkon siya sa usa ka lalaki -- ni Kendall. -- Sumpayan pa