Misa atol sa away ni Pacquiao

Domingo. Ala una sa hapon. Hapit na magsugod ang misa sa di pa ilubong ang lawas ni Nang Maria. Plastado na ang lungon sa atubangan sa altar sa San Sebastian Parish sa lungsod sa Langemek. Nia na ko sulod sa simbahan.Nia na sab ang tanang tagtungod ug mga niabay sa lubong.

Apan wa diha akong hunahuna sa misa.Nag-atbang man god ang simbahan ug ang gym diin nadungog na nako ang tingog ni Michael Buffer nga nag-announce sa fight nilang Pacquiao ug Margarito.

Nagpasalida ang gym sa lungsod sa maong away. Dunay big screen ug gipapultahan. Unya tataw kaayo ang tingog ni Michael Buffer nga nag-ingon "Let's get ready to rummmbbbblllleeeee!"

Upat ka kilometro ang gilay-on sa biyahe sa porlon nga gikargahan sa minatay. Gihaya ug gibilaran sobrag usa ka semana si Nang Maria sa ilang balay sa baryo Kuripako. Nia sa Poblasyon ang simbahan ug ang menteryo. Mga sobra usa ka gatos ka tawo ang nangabay sa lubong. Daghan man mga suod nga paryente, higala ug silingan si Nang Maria nga dugay nang biyuda. Tulo ray iyang mga anak. Usa ray kaila nako. Iyang kamanghuran.

Magkumare mi ni Nang Maria kay linudhan nako sa kasal iyang anak nga si Norelyn. Pero dako iyang pagkamaguwang nako. Mga sitentahon na siya. Wa pa koy singkwenta.

Nadisgrasya si Nang Maria sa traysikol iyang gisakyan. Nagtumod siyag anagon sa merkado unya nadasmagan iyang gisakyan og dakong bus nga nawad-an og brake. Kay paryente niya ang drayber sa bus, naareglo ra. Gani ang Green Meadow Bus Company maoy niabaga sa tanang gastohan sa hitabo. Embalsamasyon, lungon, punerarya, misa ug sa tanang pagkaon ug snack panahon sa bilar. Nihatag pa gyud og cash nga singkwenta mil pesos. Ug nipagamit sa usa ka bus nga serbis sa paglubong.

"Ninong Rudy.Kay nakabilar ka mag duha ka gabii sa niaging semana, puwede na lang di ka moabay sa lubong," ni Allan nga bana ni Norelyn, dihang nagkahinabi mi sa niaging Domingo. Tungod sa maong kasuod ug kahilig motan-aw og boksing labina sa fight ni Pacquiao, kuyog mi pirmi, mamulta sa mga big screen sa dakbayan. Labi na nga wa pa siyay anak. Sukad nakliyente nako siya sa ulitawo pa, nga nagpalaban sa usa ka kaso, suod na kaayo mi ug gipaluhod gyud ko sa iyang kasal. Dunay dakong tindahan sa siyudad si Allan.

"Ngano man?" nako pa. Nagplano man gyud kong moabay kay pagpakita sa akong pagbati nilang bana’g asawa.

"Ang lubong atol man sa fight ni Pacquiao," ni Allan.

"Way problema oy. Ang fight puwede man ta kitag replay. Ang lubong wa nay replay," nako pa. Wa na lang siya namugos.

Apan dereyot gyud ko wa kaabay ani karon. Kay nagkalibang kog tulo ka adlaw. Maayo gani nadalag tambal. Gahapon sa buntag naayo ko. Pero namiyahok kay hapit ma-dehydrated.

Hapit tanang nanimba nagpanglingi sa luyo. Kay ang pultahan sa simbahan atbang sa pultahan sa gym. Giulang lang og lapad nga karsada balig bayente metros. Dungog kaayo ang mga tingog sa komentarista sa boksing.

"Paholay nga dayon ihatag nimo, kaniya o Ginoo..." nagkanayon ang choir nga nikanta sa pasiunang awit sa misa sa patay. Naliso ang mga ulo sa mga nanambong ngadto sa altar. Haskang sipaa sa tingog sa choir ug sa organo nga duyog. Daw mauyog ang simbahan. Kusog kaayo ang volume sa sound system.

"Mabungol man sab ta aron!" reklamo ni Delia akong misis nga tupad nako sa too.

"Di man ginhapon nga kusog ang sound system ining simbahan. Ganihang buntag may giludhan man kong kasal, di man ingon ini ka kusog," sa lalaki sa akong wala.

Nakaamgo ko nga gipakusgan sa pari ang sound system sa simbahan aron di mabahin ang pagtagad sa mga tawong nanimba. Dungog man god kaayo ang gahob sa mga tawong nanan-aw sa boksing gikan sa gym. Niagwanta nalang gyud mi sa makabungol nga sound system sa misa atol sa away nila ni Pacquiao ug Margarito. (Kataposan)