Mga luha sulod sa rehas

Naabli ang pultahan sa selda. Napayahat si Momoy samtang naglingkod sa iyang teheras. Maoy misugat sa iyang panan-aw si Bishop Cielo Ayudar tupad sa jail warden nga naggunit pa sa yawe.

"May bisita ka, Mr. Momoy Dabasol. Ania siya aron mopakompisal kaninyong mga binilanggo." Pahibalo sa polis nga nagbarog sa may palid.

"Komosta ka na dinhi, anak?" Kinasingkasing sukna sa bishop dihang nakasulod na siya sa selda. Gihikap niya ang abaga ni Momoy. "Unsa man, andam ka na ba sa pagkompisal sa tanan mong mga sala?''

"Oo, Bishop. Andam na kaayo." Hinay'ng gikuptan ni Momoy ang palad sa alagad sa Diyos ug miamen.

Natandog ang balatian sa bishop. Gilingi niini ang jail warden nga diha sa iyang likod ug mihangyo: "Pwede ba, Tsip, nga biyaan mo una kaming duha dinhi?"

Ang guwardiya nga nakasabot sa mensahe nga gidala sa tinan-awan sa bishop, dali ra kaayong nakayango sa ulo ug dihadiha mipalayo.

"Sige, buksi ang ganghaan sa imong kasingkasing, anak, ug isugid ang tanan mong mga sala." Awhag sa pari ni Moymoy dihang sila nalang duha ang nahabilin sulod sa prisohan.

Ug nanumbalik sa panumdoman ni Moymoy kadtong usa ka dugoong hitabo nga maoy bunga lamang sa kakulang niya’g pasensiya ngadto sa iyang isig ka tawo.

"Nagdrayeb ako niadtong adlawa sa bag-o kong kotse subay sa Jones Avenue paingon sa Capitol. Nagdali ako, busa didto ako moagi sa fast lane. May nasundan akong Toyota Corolla nga hinay ang dagan. Giserbatohan ko ang drayber kay gusto akong moobertik, apan naunsa ba nga imbes mohatag siya nako’g lugar, nagpatunga man hinuon sa linya. Miserbato pa ko. Pero, ingon sa wa gyod makadungog ang tonto. Mihana kog signal sa tuo dihang nakita ko sa side mirror nga layo pa ang laing sakyanan nga diha sa akong likod. Pagkabig nakog sugod sa manubela dungan ang pagyatak sa gasolinador, mipakusog sab pagpadagan ang drayber sa Toyota ug morag gituyo nga dili gyod ko niya palutson kay wa man gyod siya nako mohatag og agianan. Wala na, labihan nang inita sa akong ulo. Samot na dihang hapit ako mahisaghiri sa naghagiyos nga Pajero gumikan sa pagpunay ko’g pangitag paagi nga makalusot. Haskang hayblara na nako, Bishop. Nagkayokayo na gyod akong kahiladman sa kalagot. Moto, nga pag-abot namo didto sa traffic light diin naatol nga pula ang signal, nakahigayon ko pagtupad niya. dali kong nanaog, bitbit ang 45 kalibre kong pistola. Ug dihadiha gipusil ko sa makadaghang higayon ang drayber."

Milingolingo si Bishop Cielo nga naminaw sa sugid ni Momoy.

"Pastilan no, kasimple ra gyod diay sa problema nga gihimo nimong lisod? Kun gisumpayan mo pa lang ang imong pasensiya ug wa ka magpadaog sa imong kasuko, tingale malikayan pa unta nimo ang pagpakasala."

"Mao lagi, Bishop. Magmahay man ako, ulahi na ang tanan. Di na ko makalingkawas sa life sentence imprisonment nga maoy gisentensiya sa balaod ngari kanako. Bisag unsaon nakog binut-an, dinhi na gyod ako madugta sa prisohan. Mao nga nakahukom ko nga human mo kabendisyoni ang akong mga sala, isaad ko nga ako na ang magsakristan dinhi sa chapel sulod sa Muntinglupa. Isangyaw ko sa mga inmates ang mga bulawanong pulong sa Bibliya nga taudtaod na nakong gisigeha’g basa. Siyarog di maluoy ang Ginoo, nako."

Ug nangatagak ang mga luha sulod sa rehas. (Kataposan)