Sugilanon - Pahiyom sa kaaway

Domingo. Alas sayis sa buntag. Gipaningot ug gikutasan na si Sendo nga nagtungas sa bungtod padulong sa baryo Pasamanos. Dili espaltado ang dalan ining lugara. Dirt road lang o kanang gama sa anapog. Nag-inusara lang siya sa pag-hike. Daghan untang gustong mokuyog niya. Apan iyang gibalibaran. Aron way gubot.

Kay naa siyay silingan nga magsusisusi dayon sa iyang mga kuyog kun unsay ilang giistoryahan samtang nag-hike. Si Brenda nga asawa sa iyang bayaw nga si Bruno. Pareho lang ni silang managtiayon nga insecure sa ilang pagkatawo. Daghang binuhatang ngil-ad. Unya mahadlok sawayon sa hilom. Karong buntaga, mao gyuy pagsilang sa adlaw paghimuntod ni Sendo sa kinatumyan sa bungtod. Unya may tawo sa unahan nga naglakaw sugat niya. Ug naaninaw niya nga si Bruno ang iyang mamahimong kasugat. Gikulbaan ug nangluspad si Sendo. Kay nagbahad ra ba si Bruno nga makigpatay niya kun mag-abot sila sa lugar diin siya mag-hike.

Si Bruno ug Brenda mga magtutudlo sa saring publiko sa lungsod sa San Cristobal. Si Sendo usa ka CPA apan wa magpraktis sa iyang propesyon. Nagnegosyo lang. Kusog man ilang tulo ka karenderya. Iyang kapikas nga si Cristy manghod ni Bruno. Nakahuman sab siyag Accountancy. Klasmet silang Sendo. Apan wala nikuha og board exams. Silang managtiayon ang nagdumala sa ilang karenderya sa Talamban. Ang sa Canduman si Benhur ang nagdumala, ilang kamaguwangan nga ulitawo. Sa Subangdako si Joshua ang nagdumala, ilang kamanghuran.

Nagluyo lang ang balay ni Sendo ug Bruno sa Poblasyon sa San Cristobal. Ang ilang mga luna gibalayan, hinatag ni Tatay Terio nila, amahan ni Bruno. Dihang nakakobra si Bruno ug Brenda sa ilang cash benefits sa early retirement, mohuwam untag kuwarta si Cristy nila. Gibalibaran kay kuno igo ra sang ipamayad sa ilang utang ang ilang nadawat. Wa man magpakitag kasuko si Cristy nga gibalibaran.Apan advance ang pangutok sa managtiayong way simbasimba. Nga nanuyo na si Cristy ug Sendo nila kay wa pautanga. Sukad adto nagbungol na ang managsoon ug managbayaw.

Kay hobby man ni Sendo nga mosulat og mga sugilanon sa Banat News, may sugilanong nigawas nga ang kontrabida didto way respeto ug tahod sa amahan. Nganlan lang ang amahan og buang, gianguangu, way buot. Gikonprontar ni Bruno si Sendo dihang niagi’s ilang balay, kun nganong suwat-suwat siya’g sugilanon nga nag-igo nilang managtiayon.

"Dili kay ikaw ray anak nga way respeto ug way tahod sa amahan. Wa ka nganli diha sa sugilanon. Kun nasakit ka, kiha lang! Ayaw pangitag gubot. Kun ako nanamastamas nimo pinaagi sa sugilanon, usa lang ko ka suspek. Proybaha imong kunklosyon kun insakto ba, sa husgado. Apan kun mangita gyud kag gubot, dali! Gawas sa imong gate ngari sa karsada! Kay sport ta,!" ni Sendo nga niharong.

"Di ko makig-away nimo dinhis ato. Pero pahibaw-a lang ko asa ka mag-hike. Kay sukol kog patayan didto! ni Bruno. Nipauli na lang si Sendo's ila kay di man diay makig-sport ang karaho. Pero nahurot lang gyung talaw ni Sendo. Kay kaniadto sigihan man siya’g hagad og sinumbagay ni Bruno. Mokupos lang siyag tago sa ila. Karon nga mosukol na siya, si Bruno na say dili makig-atubang. Liput gyud diay iyang gusto nga away.

Niliko si Sendo sa too. Nisum-ok sa kalibunan. Nipasalipod siya's Siyapo nga mubo nga gikatayan sa otot-otot ug cadina de amor. Namasin siyang wa pa kakita niya si Bruno. Nibutokbutok og maayo iyang dughan. Daw madungog niya iyang hinangos ug gininhawa. Ang gikahadlokan ni Sendo kay nasayud siyang may armas si Bruno. Niurong si Bruno sa tungod sa Siyapo. Nilingi sa nahimutangan ni Sendo. Nipahiyom siyang Sendo kadiyot. Ug nipadayon paglakaw. Nakapangagho ug nakapanghupaw si Sendo paglabay ni Bruno. "Whew!" namahid siya sa singot sa iyang agtang ug nawong. Dako niyang kahibulong nga wa na may kalagot niya si Bruno. Nagpahiyom na         man.

Pag-uli ni Sendo sa sila, notisya na lang iyang nasayran gikan ni Cristy. Gikargag ambulansiya si Bruno kay giatake sa kasingkasing sa iyang pagbangon ganihang buntag. "Kinsa man diay tong nipahiyom nako?" tuaw ni Sendo sa hilom. (Katapusan)