Anino sa kulto-Gula 181

“Si Padre Daniel,” gibundak ni Tiyo Berto ang maong tubag, daw may pagbasol nga namasuni sa balatian niini. Misanting ang mga dalunggan ni Carlo sa iyang nadungog. Si Padre Daniel? Wala niya damha ang maong kasayoran.

“Wala ako makabalibad dihang nagpakisayod si Padre Daniel kanako mahitungod sa bata atol sa iyang pagduaw sa paghaya kang Marta,” mipasabot si Tiyo Berto. “Gitug-anan ko siya tungod kay dako ako’g pagsalig kaniya sanglit usa man siya ka alagad sa Dios.”

Wala makatingog si Carlo. Dihay nagkalainlaing mga mananap nga pak-an nga nanaglayog sa lawak sa iyang kaisipan. Managkasumpaking mga pagbati migahom sa iyang kahiladman. Mora siya’g gidalipunga.

Mitalikod si Carlo sa tulo ug mipaingon sa pultahan. Milantaw siya sa gawas nga ingon sa wala sa kaugalingon. Napukpok niya ang palid sa pultahan. Ug nangagho siya. Namatikdan niya nga naglibog na siya pag-ayo niining mga panghitabo karon nga gipaluyohan og misteryo. Wala na siya masayod sa angay niyang buhaton. May mga pintura sa nagkadaiyang kolor nga nayabo ug gilahugay sa sanggaan sa iyang alimpatakan.

Ang iyang hunahuna mimando kaniya sa pagtulisok kang Tiyo Berto kay kini ang angay basolon sa nahitabo nila ni Arlin ug Inday Shantal. Apan lain ang gidekta sa iyang konsensiya. Ang iyang tanlag nagtudlo kaniya nga inosente sa maong hitabo si Tiyo Berto. Ang dako niining pagsalig kang Padre Daniel maoy hinungdan nga mitug-an kini sa matuod mahitungod sa bata ngadto sa pari.

Si Padre Daniel! Milugan-ob ang ngalan sa pari sa lawak sa iyang hunahuna. Angay ba niyang pahamtangan ang pari? Dihay nipis nga pagduhaduha nga inanay nahimong bulto sa katahap nga nag-umido sa iyang kaisipan. Siya kaha? Nakasukot siya sa iyang kaugalingon. Apan ang iyang katahap nahisama sa mainit nga baga nga malisod kumkomon sa iyang balatian.

Mibalik pagduol si Carlo sa nahimutangan nila ni Tiyo Berto, Jimmy ug Belen sa sopa. -- Sumpayan pa