Anino sa kulto

GULA 180

 “Hain man kaha nila dad-a si Ate Arlin ug Shantal, Gaw?” ni Belen nga naghilak, ang balatian daw gisugwakan sa kabalaka.

“Nagtuo ko nga anhi gyud nila dad-a sa Mabini ang inahan ug anak,” tubag ni Carlo. “Nia dinhi maglihok ang mga Tambayawan. Dayag na lang nga anhi gyud dad-a ang bata.”

“Apan nganong nasayod man sila, Gaw,” gikan ni Jimmy,” nga atua sa Carmen sila si Arlin ug Inday Shantal? Wala’y laing nasayod niini gawas lang kanato.”

“Mao kanay gusto kong masayran karon gikan kaninyo,” ni Carlo. “Kun gituman ba ninyo ang gibaod ni Maj. Campo nga dili gayod mosulti kang bisan kinsa kun hain nato dad-a ang bata.”

Ug gianid ni Carlo pagtan-aw ang tulo. Si Tiyo Berto nagaduko. Si Belen nga naghilak nagpamahid sa luha. Si Jimmy maila sa luta sa panagway nga gilampurnas kini sa tumang kabalaka.

“Wala akoy laing gitug-anan kun hain ang bata, Gaw,” nagkanayon si Jimmy. “Akong gituman ang gibaod sa hepe.

“Mao usab ako, Gaw,” ni Belen pa.

Niining tungora, si Tiyo Berto nagpabilin nga nagduko.

“Ikaw, Tiyo?” Sukna ni Carlo.

“P-pasayloa ko, Dong,” mikurog og diyotay ang tingog ni Tiyo Berto. Dihang miyanghag kini, nakita ni Carlo ang pagpanglipaghong sa panagway niini.

“Nga-ngano man diay, Tiyo?” gitutokan ni Carlo ang hamtong.

“W-wala nako tumana ang pahimangno sa hepe,” nagduko sa Tiyo Berto nga milaktod sa pagtug-an.

Sila si Carlo, Jimmy ug Belen nakugang sa ilang nabati. Mora sila’g gitamparos og walhon.

“G-ginoo ko,” tuaw na lang ni Belen nga mikumot sa iyang mga buhok.

“Apan kasaligan ang tawo nga akong gitug-anan, Dong,” si Carlo maoy giatubang ni Tiyo Berto.

“K-kinsa?” Sukit ni Carlo nga gitil-asan ang kahiladman. “Kinsay imong gitug-anan bahin sa atong gitagoan sa bata, Tiyo?” -- Sumpayan pa