Sex Scandal

Gula 2

Dunay gipangutana si Major Navarez ngadto ni Rodney. Nagpakisayud kini sa kalihukan sa mga priso didto sa iyang selda.

Walay lipud-lipud nga gitug-an ni Rodney ngadto sa warden ang iyang mga nasayran. Diha pa mahibaw-i ni Major Navarez nga ang mga langgam nga pati nga gibuhi sa mga priso mao diay ang gigamit pagpayuhot og shabu sa prisohan.

Ang anad kaayo nga mga langgam pati, kang kansang balay-balay gibutang nga maabut ra duol sa pultahan sa brigada, dad-on kini sa kabanay sa mga priso kun mogawas na sa BBRC human sa ilang pagbisita.

Adto sa gawas higtan niini og pakete sa shabu ang ilawom sa iyang pako ug dayon buhian. Ang langgam pati nga anad na kaayo mobalik gayud paglupad ngadto sa iyang balay-balay.

Tungod sa kasayuran nga nakuha ni Major Navarez, nasakpan niini ang pagpayuhot unta og usa ka bulto nga shabu usa ka adlaw nga “dalaw” sa mga priso. Gipaguba ni Major Navarez ang balay-balay sa mga langgam ug wala na itugot ang pagbuhi og pati sa prisohan.

Gikan niadto gihimo na si Rodney nga tigpaniid ug sinaligan ni Major Navarez. Makasuroy-suroy na siya sa tibuok prisohan. Panahon sa gabii nga ang mga priso isulod na sa mga selda, anha ra sa gawas sa brigada si Rodney uban sa laing mga sinaligan sa warden.

Dinhi nakahigayon si Rodney pakighigala sa mga babaye nga priso sa Female Brigade. Ang prisohan sa mga babaye ug lalaki giuwang og pultahan nga gihimo sa dagko nga mga rehas nga puthaw.

Nahigala ni Rodney si Tessa, usa ka maanyag nga dancer sa Sanciangko’s Wildflower nga nasakpang naghingos og shabu atol sa usa ka pot session.

Sagad magsultihanay sila nga giuwang sa rehas nga puthaw. Walay mobadlong kanila sanglit sinaligan man sa warden si Rodney. Wala tuyoa nga migitib sa ilang mga kasing-kasing ang tagsa-tagsa nila ka pagbati.

Nagkahinigugmaay sila si Rodney ug Tessa. Sagad matag gabii, maggaksanay sila nga giuwang sa rehas. Kay dagko man ang rehas nga puthaw, makahigayon ra gihapon sila pag-ukobay sa ilang masi’g ka ngabil.

Alang kanilang duha, tam-is kaayo ang ilang kinabuhi kun moabut na ang kagabhion kay walay sipyat nga sila magtagbo gayud sa pultahan nga gihimo sa rehas nga puthaw.

Usa ka gabii sa ilang pagromansahay, ingon sila sa gidaug na pag-ayo sa ilang pagbati. Mingaw ang panahon. Paniid ni Rodney lapas na ang tungang gabii ug may pagka ngiob ang maong lugar.

Sanglit dili na bag-o alang ni Tessa ang romansa, wala niya santaa si Rodney nga manghiram sa iyang kalawasan.

Wala na kapugngi si Rodney ang pagtuskig sa iyang sumbohan sa armas. Duna siya’y nahuna-hunaan para kanila ni Tessa. (Sumpayan)