Anino sa kulto

Gula 178

“Nganong karon ka pa man makatawag kanako, Mr. Sarong?” ni Carlo na usab.

“Wala dayon nako makuha ang numero sa imong cellphone,” tubag ni Roding. “Kaganina lang nako mautingkayi ang address-phonebook nga didto sa shoulder bag ni Arlin diin didto nahisulat ang imong numero.”

“Ang iya diay’ng cellphone?” ni Carlo nga daw sa wala pa matagbaw sa pagpasabot ni Roding.

“Nadala sa mga kidnaper ang cellphone ni Arlin,” matud ni Roding.

Nahilom si Carlo. Gihinuktokan niya ang gipamulong ni Roding.

“Kagabii nanawag dayon ko sa buhatan sa kapolisan sa Carmen,” namulong na usab si Roding. “Namalihog ko nila pagkontak sa kuwerpo sa kapolisan sa Mabini aron pagpahibalo sa nahitabo. Apan wala nila makontak ang kapolisan diha. Nagsige lang kuno’g bagting ang telepono apan walay mitubag.”

Wala motingog si Carlo. Nakapanglingo siya.

“Ikaw na lang ang maantigong mopasabot nila ni Jimmy sa nahitabo, Mr. Guieb,” nagkanayon si Roding tapos sa taudtaod nga kahilom.

Mitando si Carlo.

Human sa ilang panagsulti, mitawag gilayon si Carlo kang Maj. Dick Campo. Gipahibalo niya ang hepe sa nahitabo nila ni Arlin ug Inday Shantal. Nakugang si Maj. Campo. Ingon sa naglisod pagtuo ang hepe nga natultolan sa mga sakop sa kulto ang inahan ug anak.

“Pero naunsa mang pagkahitaboa, Carlo?” sukit sa hepe. “Nganong natultolan man sa mga sakop sa kulto ang dapit nga atong gitagoan sa bata nga unta kita ra may nasayod mahitungod niini? Wala man kaha kamo’y laing gisultihan kun hain nato tagoi ang bata?”

“Sa akong bahin,” ni Carlo pa. “Wala akoy laing gisultihan kun hain ang bata tungod kay mao kanay atong gikasabotan. Ambot lang kaha sila si Tiyo Berto, Jimmy ug Belen.”

“Ingon sa dili ako makatuo niining hitaboa,” sa hepe pa. “Ingon sa taas ra kaayo’g radar ang mga sakop sa kulto kay natultolan man gayod nila ang bata bisan ato silang gihiklin sa layong dapit. -- Sumpayan pa