Mi-ring ang iyang selpon, busa iya dayon kining gitan-aw.
"Gal, pila may edad nimo?" Mao kini ang nabasa ni Gally sa iyang selpon.
"Kinsa man ni?" matud niya sa kaugalingon, apan mi-reply siya. "Nganong nakaila kaman nako? Sultihi una ko sa imong ngalan, edad ug taga diin ka?" Mi-reply dayon ang nag-teks.
"Ako si Lynn, Gal, 28 years old, dalaga ug taga Negros. Admirer ko nimo labi na sa imong mga sinulat sa Banat News."
"Dako na man ko'g edad, Lynn, di ta bagay kay 99 na man ko," tubag ni Gally.
"Saba diha, Gal, oy! Sa imong mga sinulat nga akong nabasa, tingali mga 35 o 37 ka lang. Kun gusto mo, magkita ta."
"Ayaw lang, Lynn, oy kay maulaw ko. Padad-i lang hinuon ko sa imong retrato sa selpon kay padad-an ta sab ka sa ako."
Pila lang ka segundo, miabot ang retrato ni Lynn sa selpon ni Gally. Iya una kining gitubag.
"You should smile more often, you've got a lovely face and it seems to light-up when you smile, even your eyes smile." Human niini iyang gipadala ang retrato niya nga batan-on pa siya nga naka-cowboy hat.
"Di man ni ikaw, Gal, kaila man ko ini, si Dennis Roldan ni."
"Si Dennis Roldan bitaw na, Lynn, pero ang problema lang kay ako si Dennis Roldan," komedyang tubag ni Gally.
"Pag-sure, Gal, oy! Di ka gyud makigkita nako, Gal?"
"Hain man ka magpuyo, ron?"
"Nia's Lahug, ngano man diay?" "Aw, silingan ra diay ta, basin nakakita kana nako."
"Nia ka ra usab diay sa Lahug, Gal? "Wala, nia ko's Naga," komedya gihapon ni Gally.
"Di na ko nimo, Gal oy, di ka man magtinuod."
"Bitaw, Lynn, isipa lang nga ako 35 apan di lang ta magkita kay mawala unya ang imong pag-admire nako basta teksmit na lang ta. Pero kun magsugod ko sa shooting sa akong teleseries, Lynn, ikay akong kuhaon nga leading lady, kana kun mosugot ka." "Sugot ko, Gal, kanus-a man na?" "Di na magdugay, mo-teks lang ko nimo, kana kun may ikapalit ko og load."
"Padad-an ta lang ka og load, Gal."
"Ayaw lang, Lynn kay maulaw ko nimo. Basta teksmit na lang ta. Sa sunod na lang ta magteksanay, Lynn, kay piso nalang ang nahibilin sa akong load. Good night na lang, Lynn."
Sukad niadto, magka-teksmit na ang duha apan dili gyud makigkita si Gally. (Katapusan)