Anino sa kulto

GULA 177

Nahiugbok si Carlo Guieb. Alang kaniya, ang gibalita ni Roding usa ka mangil-ad nga damgo nga natibuok ngadto sa usa ka makalilisang nga daman. Usa kini ka masakit nga komedya, kun nagtiaw man lang ugaling ang nagtaho kaniya nga gidagit sila si Arlin ug Inday Shantal sa wala hiilhing mga tawo. Apan nasuta niya nga wala magtiaw si Roding. Bisan daklit lang ang ilang panaghimamat, may natugkad na siya sa kinaiya niini. Dili kini maantigong magkomedya sa usa ka seryosong butang.

Namatikdan ni Carlo nga ang mga gaway sa kabalaka mihinay pagpanguyapot sa iyang kahiladman. Misugod sa pagpanubod ang hagkot nga singot sa iyang kalawasan bisan bag-o pa siyang nahuman og kaligo.

“Unsang orasa kini nahitabo, Mr. Sarong?” Nangutana si Carlo nga ang dughan gisaog sa naghurohuro nga kakulba.

“Kagabii sa mga alas 11:30,” maoy tubag. “Unom ka tawo ang mikuha kanila. Pulos nagmaskara. Ang upat ka polis nga nagbantay gipatay sa mga kidnaper.”

“Duol ra man sa munisipyo kanang imong gipuy-an,” ni Carlo pa. “Wala ba maalarma dayon ang kapolisan sa mga butobuto?”

“Wala gyud, Mr. Guieb,” ni Roding. “Gigamitan og silencer ang mga armas sa mga kidnaper aron dili molanog ang mga buto niini. Limpiyo kaayong pagkabuhat ang pagdagit sa inahan ug anak. Mora’g giplano gayod kini nila pag-ayo.”

“Wala ba kamo pasakiti sa mga kidnaper?” pakisayod ni Carlo. “Wala ba nila unsaa ang imong asawa ug mga anak?”

“Wala man hinuon, kaluoy sa Dios,” ni Roding pa. “Sa akong pagsabot, wala sila’y interes sa akong pamilya. Sila si Arlin ug Shantal lang gyud ang ilang tuyo.”

Sa hunahuna ni Carlo dili na angay pang ipangutana kun kinsa ang nagdagit nila ni Arlin ug Inday Shantal. Ang mga sakop sa Tambayawan maoy iyang gipasanginlan nga naghimo sa ingon. -- Sumpayan pa