Singgit sa kasingkasing

Mahubas man ang kadagatan, nungka ang tubod niining akong gugma alang kanimo Sophia, adunay balaknong pagpadayag si Ian sa hinigugma.

Kun damgo man lang gani kining tanan Ian, mas gustohon kong dili mahigmata niining akong pagkatulog kay basin sa akong pagbangon mahanaw na ikaw kanako tugbang nga pulong usab ni Sophia sa ulitawo.

"Dili kana mahitabo mahal ko, tungod kay ang kamatayon lamang ang adunay katungod nga mobulag kanato," ni Ian.

"Kinabuhi lamang ang mahimong kutloon sa kamatayon apan dili ang atong mga pagbati, ug kung ugaling moabot kana nga higayon kanato. Mao kini ang timan-i nga ang bugtong mong pangalan lamang ang kanunay'ng isinggit niining akong kasingkasing," pasalig usab ni Sophia.

Ingon sa walay sangpotanan ang kalipay sa ilang pagminahalay niadtong tungora apan sungogan gayod ang kapalaran ug masukdanon gayod ang matuod nga gugma.

Tungod kay nagplano na unta silang duha nga magminyo inig balik ni Ian gikan sa laing nasud. Usa ka chief mate si Ian sa usa ka dako nga tanker vessel nga nagabase sa Europa. Samtang usa usab ka branch manager sa bangko si Sophia dinhi sa Sugbo.

Ug pagkahuman sa iyang kontrata sa maong shipping company, mipauli gilayon ang ulitawo dinhi sa nasud. Wala siya mag eroplano paingon dinhi sa Sugbo gikan sa Manila dihang nahiabot siya dinhi sa Pilipinas. Misakay si Ian sa Princess of the Star nga gipanag-iya sa Sulpicio Lines sanglit usa usab ka tripulante ang iyang igsuon sa maong barko.

Puno sa kahinam ang gibati ni Sophia sanglit moabotay na gayod ang iyang hinigugma ug umaabot usab niyang bana. Tungod kay sa pagdunggo gayod niini   hikayon gilayon nila ang ilang mga papeles aron pagpangandam sa ilang umaabot nga kasal.

Apan nausab ang tuyok sa kalibutan sa dalaga dihang usa ka buntag niana iyang nabalitaan sa radyo nga nalunod ang barko nga gisakyan sa iyang pamanhunon nga si Ian. Ug ang labing sakit niini, usa ang iyang hinigugma nga wala gipalad nga maluwas. (Kataposan)