Ruth

"Gusto ko nga ang itawag nga ngalan sa atong anak mao ang ngalang Ruth," matud ni Andoy ngadto sa iyang asawa nga si Celia nga bag-o pang nanganak.

"Nganon Ruth man, Doy?" sukna ni Celia sa iyang bana. "Dili man hinoon Britney kay ngalan sa inilang artista ug singer pa gayud."

"Tungod kay ang maong ngalang Ruth, ngalan sa usa ka babaye nga sulondon nga nabasahan ko sa Biblia," matud ni Andoy.

"Unsa man diay ang kaagi ni Ruth nga imong nabasahan sa Biblia," pangutana ni Celia.

"Paminaw Cel kay suginlan ko ikaw," tubag ni Andoy.

Niadtong panahon nga ang namunuan sa Israel mao ang mga maghuhukom dinhay magtiayon nga sila si Elimelec ug Naomi nga nanimuyo sa Bethlehem. Niadtong panahona may nahitabo nga gutom sa Bethlehem. Busa miadto sila sa Moab kay didto dagaya ang pagkaon. Kauban nila ang ilang duha ka anak nga si Mahlon ug Chelion. Namatay didto sa Moab si Elimelec ug didto usab naminyo ang iyang duha ka anak. Si Mahlon naminyo kang Ruth ug si Celion kang Orpah. Wala silay mga anak. Namatay sila human sa napulo ka tuig. Nahimong biyuda sila si Naomi, Ruth ug Orpah.

Miabot na usab ang usa ka gutom sa yuta apan didto na sa Moab busa mihukom si Naomi nga mobalik sa Bethlehem. Sa dalan gisultihan ni Naomi ang duha ka umagad nga mobalik na lang sa ilang mga ginikanan. Si Orpah mibalik sa iyang ginikanan apan si Ruth midumili pagbalik. Gipalabi niya nga mounong sa iyang ugangan.

"Kun asa ikaw, adto ako", matud ni Ruth. Miuyon na lamang si Naomi. Didto sa Bethlehem, nanghagdaw si Ruth sa mga umahan nga giani.

Usa sa gihagdawa ni Ruth ang uma nga ang tag-iya si Booz. Si Booz, kaliwat ra usab ni Naomi. Nasayod si Booz sa kaagi ni Ruth, kun daw unsa siya nag-antus uban ni Naomi. Nabalitaan ni Booz nga si Ruth miunong sa iyang ugangan.

Niadtong gipalit ni Booz ang kabilin ni Naomi, gipangasawa usab niya si Ruth. Nanganak si Ruth kang Obed. Ug si Obed nakabaton og anak nga si Jesse. Ug si Jesse nakabaton og mga anak nga ang usa niini mao si Haring David nga nahimong bantugang hari sa Israel. (Katapusan)