Uhaw sa karinyo

Gula 10

 “Dia ko’y dala nga gamay’ng makaon Rick, mangaon usa ta kay aron dili ta gutomon,” agda ni Leny kang Ricardo.

Gisaw-an nila ang pagkaon ni Leny. Nagtapis lang silang duha samtang nagkaon. Matag karon ug unya mopasiplat si Ricardo sa dughan ni Leny nga matintalon kaayo.

“Ayaw na gud sige’g pasiplat diha Rick, natagbaw ka na bitaw kaganina. Kaon diha kay maligo na ta,” matud ni Leny nga nakabantay nga pirming mopasiplat kaniya si Ricky.

Namalik sila sa baybayon. Tugob na kaayo sa kalipay ang ilang pag-night swimming. Nagpares-pares ang tulo ka magbarkada sa tagsa-tagsa nila ka hinigugma.

Wala nay pupanagana si Leny nga mogakus ni Ricardo. Kanunay usab siya nga hagkan ni Ricardo panahon sa ilang pagparayganay. Dayon giabot og kapuol ang magbarkada sa pagkaligo. Namalik sila sa ilang tagsa-tagsa ka cottage.

Sa makausa pa, gitagay na usab nila ni Leny ug Ricardo ang kalipay. Niining ikaduhang hugna sa ilang kumbati, ingon sa misamot og ka-powerful si Ricardo kay nadugangan pa kagahi ang iyang Junior.

Human sa makapoy nila nga kumbati, nakatulog sila nga naggaksanay. Pagka-kaadlawon, nakamata si Ricardo kay nabatyagan niya nga migahi na usab ang iyang Junior.

Napaud man gud diay kini sa samput ni Leny nga iyang gigakus samtang nagtalikud. Hinay-hinay niya nga gipukaw si Leny sa mainit niyang mga hawok ug sa makausa pa, gitagay nila ug gisaw-an ang kalipay.

Pagka buntag, namauli ang magbarkada luwan sa tagsa-tagsa nila ka sakyanan. Diha na sila sa North Reclamation Area dihang giawhag ni Ricardo si Leny nga mohapit usa sila sa menteryo.

“Bisitahan nato ang lubong sa akong Mama ug sa imong bana, Len,” matud ni Ricardo. “Sige wala’y problema, mohapit ta,” ni Leny pa nga miliko na paingon sa Queen City Gardens.

Didto sa menteryo, samtang nagbarug sa atubangan sa lubong sa iyang inahan. “Ma, anugon nga patay ka na. Nakakita na g’yud ko og babaye nga akong giingon kanimo kaniadto nga akong higugmaon.”

Nakalitan si Leny sa iyang nadungog. Miuna siya paglakaw sa lubong sa namatay niyang bana didto sa unahan. “Pasayloa ko Dong, nakasala ko sa atong kaminyoon uban ni Ricardo gabii.”

Takulahaw lang nga miabut si Ricardo ug miagbay kaniya. Taud-taud misulti si Ricardo atubangan sa lubong. “Bay, mananghid ko nimo, akong higugmaon ang imong asawa ug ako siyang pakaslan. Ako ang mopadayon sa naputol mo nga katungdanan kaniya.”

Sa kalipay, nagakus ni Leny si Ricardo atubangan sa lubong sa iyang bana. Nakahilak si Leny sa kalipay. Naaninaw nila nga walay tawo sa sam-ang kay sayo pa. Nag-ukobay dayon ang ilang mga ngabil. (Kataposan)